Тошкент вилояти ССБнинг маъсул ходими бошқармага қарашли махсус тиббий таъминот базасида сақланаётган тиббиёт буюмларини харидорга ҳужжатларни қалбакилаштириш орқали 57 минг 880 долларга сотишга келишган.
У олдиндан 40 минг доллар олган вақтида ушланди. Ҳозирда мазкур шахсга нисбатан Жиноят кодексининг 167-моддаси 3-қисми “а” банди (жуда кўп миқдорда ўзлаштириш ёки растрата йўли билан талон-торож қилиш) ва 209-моддасининг (мансаб сохтакорлиги) 1-қисми билан жиноят иши қўзғатилиб, қамоқ эҳтиёт чораси қўлланди.
Шунингдек, Жиззах вилоятида “Ҳудудий электр тармоқлари” АЖ Жиззах филиали Шароф Рашидов тумани электр таъминоти бўлими бош муҳандиси “Энергосавдо” корхонасининг туман бўлими назоратчиси билан ўзаро тил бириктирган.
Улар ЯТТнинг М-39 халқаро автомагистрал йўли ёқасида жойлашган ер майдонига электромобилларни қувватлантириш шохобчасини ташкил этиши учун 400 кВт ли трансформатор ўрнатиш, тегишли тартибда барча ҳужжатларни тайёрлаш ва тармоққа улаб бериш эвазига 90 млн сўм олган вақтида ушланди.
Ҳозирда мазкур шахсларга нисбатан Жиноят кодексининг 214-моддаси 3-қисми (давлат органи, давлат иштирокидаги ташкилот ёки фуқароларнинг ўзини ўзи бошқариш органи хизматчисининг қонунга хилоф равишда моддий қимматликлар олиши ёки мулкий манфаатдор бўлиши) “в, г” бандлари билан жиноят иши қўзғатилиб, тергов ҳаракатлари олиб борилмоқда.
Бундан ташқари, Жиззах шаҳрида ўтказилган тезкор тадбирда Намангандаги мактаблардан бирининг директор ўринбосари абитуриентларга миллий сертификат олиш бўйича имтиҳонларнинг тест саволлари ва жавобларини мансабдор танишлари орқали олиб беришни ваъда қилган.
Бунинг эвазига 20 минг доллар талаб қилиб, 8 минг доллар ва 156 млн сўм олган вақтида ушланди.
Ҳозирда мазкур шахсга нисбатан Жиноят кодексининг 25,168-моддаси (фирибгарлик) 4-қисми “а” банди билан жиноят иши қўзғатилиб, тергов ҳаракатлари олиб борилмоқда.
Изоҳ (0)