Ўзбекистоннинг Истанбулдаги Бош консулхонаси Туркияда ўзбекистонликлар виза билан боғлиқ фирибгарликка учраётганидан огоҳлантирди.
Маълум қилинишича, сўнгги вақтларда Туркия ҳудудида айрим тоифадаги жисмоний ва юридик шахслар томонидан Ўзбекистон фуқароларига йирик пул маблағлари эвазига АҚШга доимий яшашга юбориш, шунингдек, Европа мамлакатларининг визаларини расмийлаштириб беришни ваъда қилиш орқали фирибгарлик жиноятларининг содир этилиши ҳолатлари кўпаймоқда.
Бу тоифадаги шахсларга ишонган фуқаролари жиддий муаммоларга дуч келиб, уларнинг кўрсатмаси билан турли хорижий давлатларга, асосан Осиё ва Африка давлатларига бориб, у ерда сарсон-саргардон бўлмоқда.
“Куни кеча АҚШга кетиш илинжида фирибгарлар тузоғига тушиб, Африка ва Лотин Америкаси давлатларида фарзанди билан оғир аҳволда қолган яна бир аёл ватандошимиз Бош консулхона ёрдамида Ўзбекистонга юборилди”, дейилади хабарда.
Бош консулхонаси ноқонуний миграция қуйидаги жиддий оқибатларга олиб келишидан огоҳлантирди:
- пул маблағларингизни фирибгарлар ўзлаштириб юбориши;
- ҳужжатларингизнинг ноқонуний йўл билан олиб қўйилиши;
- чет элда ҳужжатсиз қолиб, ҳуқуқий муаммоларга дуч келиш;
- жиноий жавобгарликка тортилиш;
- депортация ёки узоқ муддатли тақиқларга учраш.
“АҚШга ёки Европа мамлакатларига қонуний йўл билан чиқиш учун фақат расмий ваколатли идораларга мурожаат қилинг. Визани ёки АҚШга ноқонуний ўтишни ваъда қилиб, пул талаб қилаётган шахсларга ишонманг”, дея огоҳликка чақирди Бош консулхона.
Аввалроқ Ўзбекистоннинг Истанбулдаги Бош консулхонаси Туркияда айрим жиноий гуруҳлар Ўзбекистон фуқароларига катта пул мукофоти ваъда қилиб, уларни Европа иттифоқига, асосан Грецияга ноқонуний муҳожирларни денгиз орқали ўтказишда воситачи сифатида ишлатишга ҳаракат қилаётгани ҳақида хабар берганди.
1 февралдан Туркияга шартли кириш (şartlı giriş) тартиби бекор қилинганини ҳам эълон қилганди. Қонуний қолиш муддати тугаган ёки яшаш гувоҳномаси (ikamet izni) олиш рад этилган фуқароларни ушбу мамлакат қонунини ҳурмат қилган ҳолда тарк этишни сўради. Чунки бу турдаги қоидабузарликлар Туркияга қайтиш имкониятининг чеклаб қўйилишига сабаб бўлиши мумкин.
Изоҳ (0)