Туркия суди молиявий пирамида ташкил қилган икки ака-укани ҳибсга олди. Қўлга олинган Меҳмет Айдин ва Фотиҳ Айдин “жиноий фаолиятдан олинган даромадларни легаллаштириш”, “жиноий ташкилотга раҳбарлик қилиш” ва “оғирлаштирувчи ҳолатларда фирибгарлик” жиноятлари учун ҳар бири 45 376 йил 6 ойга озодликдан маҳрум этилди.
Судда ҳибсга олинган жами беш нафар айбланувчи, жумладан ака-ука Айдинлар, жабрланувчилар ва томонларнинг адвокатлари иштирок этди. Прокурор ака-укалар юқорида санаб ўтилган жиноятларни содир этгани учун 4414 марта жазоланишини талаб қилди.
Суд қарорида иккала айбланувчига жами 88 302 йилгача озодликдан маҳрум этиш жазоси, бошқа айбланувчиларга эса турли жиноятлар учун турли муддатларда озодликдан маҳрум қилиш жазоси сўралган.
“Фирибгарлик қилиш ниятим йўқ эди”
Ўз ҳимоясига чиққан Меҳмет Айдин “бу бизнесга алдаш ниятида кирмаганини, ҳеч кимни алдамагани”ни таъкидлади.
Мен киритган сармоя орқали қурбонлар зарарини қоплаш мумкин. Улар давлат пулларни мусодара қилгани сабабли зарар кўришди, дейди у.
Фотиҳ Айдин ва бошқа айбланувчилар айбловларни рад этиб, ташкилотга ҳеч қандай алоқаси йўқлигини айтишди ва оқлов ҳукмини талаб қилишди.
Мен ҳеч бир ташкилотга аъзо эмасман. Айбланувчиларнинг кўпчилиги мени танимайди. Мен етакчи бўлишим учун улар мени билишлари керак, мен эса уларнинг кўпчилигини билмайман, дейди Фотиҳ.
Суд қарори
Çiftlik Bank номи билан танилган тизим асосчилари сифатида ҳибсда судланган Меҳмет Айдин ва Фотиҳ Айдинларнинг ҳар бири 45 376 йил 6 ойлик қамоқ жазосига ҳукм қилинди.
Кўплаб фуқароларни катта даромад ваъда қилиб алдаб келган Çiftlik Bank деб номланган тизим асосчиси Меҳмет Айдин икки йилдан ортиқ вақт давомида қочиб юрганидан сўнг Туркия сўровига кўра Бразилия томонидан депортация қилинган. Тергов доирасида қочоқ сифатида қидирилаётган Фотиҳ Айдин 2021 йил июль ойида Уругвайда қўлга олинган ва Туркияга экстрадиция қилинган.
Бош прокуратура томонидан тайёрланган 5 та алоҳида айблов хулосасида Меҳмет Айдин ва Фотиҳ Айдинларга жиноят содир этиш мақсадида ташкилот тузиш ва бошқариш, ахборот тизимларидан восита сифатида фойдаланган ҳолда фирибгарлик ва тижорат компаниялари фаолияти доирасидаги фирибгарлик билан боғлиқ жиноятларда 4582 кишига зарар етказгани учун 25 699 йилдан 85 646 йилгача қамоқ жазоси сўралган.
Изоҳ (0)