ДХХ ва Бош прокуратура ҳузуридаги департамент ходимлари томонидан ўтказилган тезкор тадбирда Андижонда пул эвазига Японияга юборишни ваъда қилган шахслар ушланди.
Хусусан, Андижон шаҳрида яшовчи, 1990 йилда туғилган шахс фуқароларни Японияга ишга юбориш бўйича ижтимоий тармоқлар орқали эълон тарқатиб, кўпчиликнинг ишончига кирган. Аммо у Тошкент шаҳрида истиқомат қилувчи фуқарони амалдаги тартиб-қоидаларни четлаб ўтган ҳолда, Япония давлатига ишлаш учун юбориш эвазига 7400 АҚШ доллари олган вақтида ДХХ ва Бош прокуратура ҳузуридаги департамент ходимлари томонидан ашёвий далиллар билан ушланган.
Унга нисбатан Жиноят кодексининг 168-моддаси (фирибгарлик) 2-қисми “а” банди билан жиноят иши қўзғатилди.
Бошқа ҳолатда эса Андижон вилоятининг Олтинкўл туманида яшовчи, 1995 йилда туғилган шахс ва унинг Тошкент шаҳрида истиқомат қилувчи, 1995 йилда туғилган таниши ўзаро тил бириктириб, пойтахтлик фуқаронинг ишончига кирган. Улар мансабдор танишлари орқали фуқарони Японияга ишга юбориш эвазига 2500 АҚШ доллари талаб қилган.
Ҳуқуқни муҳофаза қилувчи органлар томонидан ўтказилган тезкор тадбирда улардан бири —Тошкент шаҳрида яшовчи, 1995 йилда туғилган шахс сўралган пул маблағини олган вақтида ашёвий далиллар билан ушланган.
Қонунбузарларга нисбатан Жиноят кодексининг 168-моддаси (фирибгарлик) 2-қисми “а” банди билан жиноят иши қўзғатилди.
Миграция агентлиги бош мутахассиси Жасур Саъдуллаев фуқаролардан Миграция агентлиги ҳамда тегишли лисензияга эга 18 та хусусий бандлик агентликларидан ташқари, ҳар қандай шахслар ёки тадбиркорлик субъектлари томонидан чет элга ишга юбориш бўйича билдириладиган асоссиз таклифларга алданиб қолмасликларини сўради.
“Хорижий давлатларга қонуний тартибда ишлаш учун бормоқчи бўлган ватандошларимиз “хориждаиш.уз” электрон платформасидан зарур маълумотларни олишлари мумкин. Бундан ташқари, Миграция агентлигининг 1282 ёки 71-200-00-61 рақамларига қўнғироқ қилишлари, шунингдек, унинг ҳудудий филиалларига ташриф буюриб мутахассислардан бепул маслаҳатлар олишлари мумкин”, дейди мутахассис.
Чет элда ёрдамга муҳтож бўлиб қолган фуқаролар эса 17 та давлат ҳудудидан халқаро чиқиш кодлари орқали 1282 қисқа рақамига тўғридан тўғри бепул қўнғироқ қилиб, амалий ёрдам олишлари мумкин.
3 февраль куни Тошкентнинг Учтепа туманида фуқародан фирибгарлик билан 20 минг доллар олган шахслар ушланганди. Улар фуқарони АҚШга ишга юборишини айтиб, алдаган. 13 январда Самарқанд вилоятининг Ургут туманида яшовчи фуқаро ўғли билан тил бириктириб, икки кишини АҚШга ишга юборишини айтиб, эвазига 21 минг доллар талаб қилганди.
Изоҳ (0)