Toshkent viloyati SSBning maʼsul xodimi boshqarmaga qarashli maxsus tibbiy taʼminot bazasida saqlanayotgan tibbiyot buyumlarini xaridorga hujjatlarni qalbakilashtirish orqali 57 ming 880 dollarga sotishga kelishgan.
U oldindan 40 ming dollar olgan vaqtida ushlandi. Hozirda mazkur shaxsga nisbatan Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish) va 209-moddasining (mansab soxtakorligi) 1-qismi bilan jinoyat ishi qo‘zg‘atilib, qamoq ehtiyot chorasi qo‘llandi.
Shuningdek, Jizzax viloyatida “Hududiy elektr tarmoqlari” AJ Jizzax filiali Sharof Rashidov tumani elektr taʼminoti bo‘limi bosh muhandisi “Energosavdo” korxonasining tuman bo‘limi nazoratchisi bilan o‘zaro til biriktirgan.
Ular YTTning M-39 xalqaro avtomagistral yo‘li yoqasida joylashgan yer maydoniga elektromobillarni quvvatlantirish shoxobchasini tashkil etishi uchun 400 kVt li transformator o‘rnatish, tegishli tartibda barcha hujjatlarni tayyorlash va tarmoqqa ulab berish evaziga 90 mln so‘m olgan vaqtida ushlandi.
Hozirda mazkur shaxslarga nisbatan Jinoyat kodeksining 214-moddasi 3-qismi (davlat organi, davlat ishtirokidagi tashkilot yoki fuqarolarning o‘zini o‘zi boshqarish organi xizmatchisining qonunga xilof ravishda moddiy qimmatliklar olishi yoki mulkiy manfaatdor bo‘lishi) “v, g” bandlari bilan jinoyat ishi qo‘zg‘atilib, tergov harakatlari olib borilmoqda.
Bundan tashqari, Jizzax shahrida o‘tkazilgan tezkor tadbirda Namangandagi maktablardan birining direktor o‘rinbosari abituriyentlarga milliy sertifikat olish bo‘yicha imtihonlarning test savollari va javoblarini mansabdor tanishlari orqali olib berishni vaʼda qilgan.
Buning evaziga 20 ming dollar talab qilib, 8 ming dollar va 156 mln so‘m olgan vaqtida ushlandi.
Hozirda mazkur shaxsga nisbatan Jinoyat kodeksining 25,168-moddasi (firibgarlik) 4-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Izoh (0)