АҚШ Колумбияга санкциялар жорий этиши фонида Колумбия президенти Густаво Петро америкалик ҳамкасби Дональд Трампга мурожаат қилди. У ҳамкасбини очкўзлик ва манманликда айблади.
Трамп, очиғини айтсам, АҚШга саёҳат қилишни унчалик ёқтирмайман, у бир оз зерикарли, лекин тан олишим керак, у ерда мақтовга лойиқ нарсалар ҳам бор. Вашингтоннинг қора танлилар яшайдиган ҳудудларига боришни яхши кўраман. У ерда қора танлилар ва лотин америкаликликлари ўртасида баррикадалар билан бўлган жанжални кўрдим. Бу менга ғалати туюлди, чунки улар бирлашиши керак эди, деди президент Петро.
У америкалик ҳамкасби “очкўзлиги туфайли инсониятни йўқ қилаётгани”га тўхталди.
Балки бир куни, гастритимга қарамай ичишга рози бўладиган виски устида, бу ҳақда очиқчасига гаплашамиз. Аммо бу қийин, чунки мени ва ҳар қандай колумбияликни паст ирқдан деб ҳисоблайсиз, ваҳоланки, ундай эмасмиз. Агар қайсар одамни танийдиган бўлсангиз, бу менман. Сиз Аллендега қилганларидек, иқтисодий кучингиз ва манманлигингиз билан давлат тўнтаришини амалга оширишга уриниб кўришингиз мумкин, деди у.
Густаво Петро Колумбия ёнида қулдорларни кўришни истамаслигини қайд этди.
“Сизга бизнинг эркинлигимиз ёқмайди, майли. Мен оқ танли қулдорлар билан қўл бериб кўришмайман”, дея хулоса қилди Колумбия раҳбари.
Колумбия ва АҚШ ўртасида мигрантлар бўйича кескинлик
Колумбия президенти депортация қилинган колумбияликларни ташиётган АҚШ самолёти мамлакатга киритилмаслигини айтди. Трамп бунга жавобан Колумбия товарларига 25 фоизлик бож, Колумбия амалдорларининг АҚШга киришини тақиқлаш, “виза санкциялари” жорий этишини таъкидлади. У колумбиялик ҳамкасбини “халқи орасида унчалик машҳур бўлмаган” раҳбар деб атади.
Колумбия ҳам АҚШдан келадиган товарларга жавоб божларини жорий қилишини билдирди. Республика президенти Густаво Петро Америка товарларини маҳаллий маҳсулотлар билан алмаштиришга чақирди. У АҚШдан мигрантларга жиноятчилардай муносабатда бўлмасликни сўради. Сабаби мигрантлар қўлида кишан ва ҳарбий самолётда депортация қилинган. Эндиликда Колумбия АҚШдан депортация қилинаётган фуқароларини ватанига қайтариш учун президент самолётидан фойдаланади. Мигрантларни қабул қилишга розилик бергани сабабли АҚШ божлар ва санкцияларнинг бир қисмини бекор қилди.
Изоҳ (0)