32 ёшли хонанда ва актриса Селена Гомес АҚШ президентининг иммиграция сиёсатидан норозилиги ва мексикаликларни қўллаб-қувватлагани учун сиёсий можаролар марказида қолди.
28 январь куни Гомес АҚШ президенти Дональд Трампнинг ноқонуний мигрантларни оммавий депортация қилиш қарорига жавобан видеомурожаат қолдирди. Унда хонанда ўзини йиғидан тўхтата олмади ва қашшоқлик туфайли уйларини тарк этишга мажбур бўлган муҳожирларга кўз ёшлар билан ҳамдардлик билдирди:
“Мен бутун халқимга ачинаман. У ерда болалар ҳам бор. Афсус, мен буни ўзгартириш учун бирор нарса қилишга ҳаракат қиламан, аммо нимадан бошлашни ҳам билмайман. Мен қўлимдан келганича ҳаракат қиламан, ваъда бераман”, деди хонанда.
Танқидлар тўлқинидан сўнг хонанда постни ўчириб ташлади, бироқ видео интернетда тарқалишга улгурган эди. АҚШ Сенатига номзод бўлган Сем Паркер бунга жавобан хонандани депортация қилиш лозимлигини айтди. Унинг сўзларига кўра, “Селена Гомес Америка фуқаролигини қадрламайдиган шахсдир”.
Гомес ҳам сукут сақламади ва сиёсатчига киноя билан жавоб берди:
“Эҳ, жаноб Паркер, жаноб Паркер. Кулдирганингиз ва таҳдидлар учун раҳмат”.
Селена Гомес мексикалик авлод сифатида масъулият ҳис қилишини ва ўз платформасидан фойдаланган ҳолда, ушбу мавзуда баралла гапиришга тайёр эканини билдирган эди. Хонанда ички қўрқув адолат учун курашишга халақит бермаслиги ва миллионлаб одамлар келажагига таъсир қиладиган ушбу муаммони ёритиш долзарб масала эканлигини ҳам таъкидлади.
Иммиграция ва божхона полицияси (ICE) маълумотларига кўра, АҚШда олиб борилган рейдларда 956 киши ҳибсга олинган, бу рақам Трамп президентликка сайланганидан бери энг катта кўрсаткичдир. BBC маълумотларига кўра, рейдлар Чикаго, Ньюарк ва Майами каби шаҳарларда, кенгайтирилган ваколатларга эга федерал агентликлар иштирокида ўтказилган.
Трампнинг миграция сиёсати ҳақида
АҚШ президенти 21 январь куни чегарадаги барча ноқонуний ўтиш жойлари ёпилишини таъкидлади. У АҚШ жанубий чегараси орқали ноқонуний мигрантларнинг киришини тақиқлаш тўғрисидаги фармонни имзолади. Бошпана излаш баҳонаси билан у ерда қолиш ҳуқуқини чеклади.
Президент Ички хавфсизлик вазирлиги, Адлия вазирлиги ва давлат департаментига АҚШга жанубдан ноқонуний кираётганларни чиқариб юбориш чораларини кўришни топширди. Пентагон чегарага қўшимча 1,5 минг аскар ва вертолётлар юборилишини эълон қилди. Шунингдек, 5 мингдан ортиқ ноқонуний мигрантларни депортация қилиш учун авиация тақдим этилади, уларнинг оқими ва ноқонуний савдосини тўхтатиш учун вақтинчалик ва доимий тўсиқлар қурилади.
Мексика президенти АҚШга бориш учун унинг мамлакатига келаётган ноқонуний мигрантлар ўз ватанларига қайтариб юборилишини айтди. Мексика АҚШдан ноқонуний мигрантларни олиб келаётган ҳарбий транспорт самолётини қабул қилишдан бош тортди.
Изоҳ (0)