Американинг бир қатор шаҳарларида мамлакатдан ноқонуний муҳожирларни оммавий депортация қилишга қарши намойишлар бўлиб ўтди, деб хабар берди маҳаллий KTLAтелеканали.
Аниқланишича, энг йирик норозилик намойиши Лос Анжелесда ўтказилган.
Минглаб намойишчилар президент Трампнинг оммавий депортация ва иммиграция бўйича сиёсатига қарши чиқиб, Лос Анжелеснинг тарихий марказидаги кўчалар ва 101-трассани тўсиб қўйган.
Бундан ташқари, Калифорниянинг жанубидаги бир нечта шаҳарларда ва АҚШнинг бошқа қисмларида ҳам норозилик намойишлари бўлиб ўтди, дейилади хабарда.
Қайд этилишича, намойишчилар мамлакатнинг янги миграция сиёсати туфайли АҚШдан депортация қилиниши мумкин бўлган ноқонуний муҳожирларни қўллаб-қувватлаган.
Newsweek нашрининг хабар беришича, норозилик намойишлари Арканзас, Миссури ва Жоржия штатларининг шаҳарларида ҳам бўлиб ўтган, бироқ “энг кескин” норозилик чиқишлари Техас ва Калифорниянинг бир қатор шаҳарларида кузатилган.
Аввалроқ АҚШ чегара хавфсизлиги масалалари бўйича масъул шахс Том Ҳоман Трамп президентлигининг дастлабки ҳафтасида АҚШдан 4 мингдан зиёд муҳожир чиқариб юборилганини маълум қилган эди.
АҚШнинг собиқ президенти Жо Байден даврида мамлакат жанубий чегараси орқали ноқонуний кириб келувчилар сони рекорд даражага етган эди. АҚШ чегара қўриқлаш хизматининг расмий маълумотларига кўра, 2021 йил январидан буён 8 миллиондан ортиқ муҳожир АҚШ чегарасини ҳужжатларсиз кесиб ўтган.
20 январь куни Трамп АҚШнинг 47-президенти сифатидаги илк нутқида АҚШ ҳудудига ноқонуний шахсларнинг кириб келишини дарҳол тўхтатиш ва миллионлаб мигрантларни мамлакатдан чиқариб юбориш жараёнини бошлашга ваъда берди. Шунингдек, у мамлакатнинг жанубий чегарасидаги вазият туфайли бутун АҚШ миқёсида фавқулодда ҳолат режимини жорий этди.
Изоҳ (0)