Шимолий Корея янги авлод стратегик қанотли ракеталарининг илк синовини ўтказди. Бу ҳақда Deutsche Welle хабар берди.
Корея марказий ахборот агентлиги “Пулхвасал-3-31” ракетаси ҳали ишлаб чиқиш босқичида эканини маълум қилиб, парвоз қўшни давлатлар учун хавф туғдирмаганини маълум қилди. “Стратегик” деганда одатда ядровий таҳдид назарда тутувчи қурол тушунилади.
“Синов қурол тизимини доимий янгилаш жараёни бўлиб, у мунтазам ва мажбурий тадбирларнинг бир қисмидир”, — дейилади хабарда.
Мазкур хабар Жанубий Корея ҳарбийлари Шимолий Корея ғарбий қирғоқлари яқинидаги сувларга бир нечта қанотли ракеталарни учирганини аниқлаганидан бир кун ўтиб эълон қилинди. Жанубий Корея мудофаа вазири Син Вон Сик ракета учирилишини қоралаб, уларни мамлакат учун жиддий таҳдид деб атади.
14 январь куни Пхеньян қаттиқ ёнилғида ишлайдиган ўрта масофага мўлжалланган биринчи баллистик ракетасини синовдан ўтказди.
Шимолий Кореянинг қанотли ракеталарининг фаолияти БМТнинг санкциялари билан бевосита тақиқланмаган. Қанотли ракеталар одатда реактив қувватга эга ва баллистик ракеталарга қараганда пастроқ баландликда учади, бу уларни аниқлаш ва ушлаб қолишни қийинлаштиради.
Корея яриморолида кескинлик кучаймоқда
Январь ойи бошида Шимолий Корея Жанубий Корея ороллари томон 200 тадан ортиқ снаряд отганди. Бунга жавобан Жанубий Корея Қуролли кучлари ўқ отиш машқларини ўтказди.
Ўтган йил декабрь ойида Пхеньян бир неча синовлардан сўнг, Шимолий Корея томонига кўра, парвоз масофаси 1002,3 километрни ташкил этган қитъалараро ракетани учирди. Ноябрь ойида КХДР коинотга ўзининг биринчи ҳарбий разведка сунъий йўлдошини юборди.
Изоҳ (0)