Трамп Ким Чен Иннинг АҚШга қарши баёнотини қўллаб-қувватлади
АҚШнинг собиқ президенти Дональд Трамп Шимолий Корея етакчисининг АҚШ-Жанубий Корея ҳарбий машғулотлари ҳақидаги баёнотини қўллаб-қувватлади. Бу ҳақда Independent хабар берди.
КХДР етакчи АҚШ ва Жанубий Корея ҳарбий машғулотларидан норозилик билдирганди.
"Президентлигим даврида жуда яхши танишган ва яхши муносабатда бўлган Ким Чен Ин АҚШ ва Жанубий Корея биргаликда машғулотлар ва ҳаво машқларини ўтказаётганидан норози. У таҳдидни ҳис қилмоқда”, — деди у.
Сиёсатчи Жанубий Корея АҚШга қиммат машғулотлар ўтказиш учун етарлича маош бермаётганидан шикоят қилди. Сўнгги ҳафталарда Шимолий ва Жанубий Корея ўртасидаги таранглик кучайган.
Шимолий Корея 18 февраль куни қитъалараро баллистик ракета учирди ва у Япония денгизига тушди. КХДР расмийларига кўра, бу синовлар Жанубий Корея ва АҚШга яқин ҳафталарда режалаштирилган ҳарбий машғулотлар туфайли огоҳлантириш ҳисобланади. Бунга жавобан Жанубий Корея, Япония ва АҚШ стратегик бомбардимончи ва яширин қирувчи самолётлар иштирокида қўшма машғулотлар ўтказди. Шимолий Кореянинг ракета ва ядро қуроллари дастурлари БМТ томонидан тақиқланган, бироқ мамлакат уларни ривожлантиришда ва қўшниларига таҳдид қилишда давом этмоқда.
2023 йил февраль ойида Ким Чен Ин Пхеняндаги ҳарбий парадда иштирок этганди. Парадда Шимолий Кореянинг баллистик ракеталари намойиш қилинган. Таҳлилчилар фикрича, бу ракеталар АҚШга зарба беришга қодир ва ядровий зарба учун ишлатилиши мумкин.
