КХДР Олий халқ ассамблеяси конституцияга Шимолий Кореянинг ядровий давлат мақомини мустаҳкамловчи ўзгартиришларни қабул қилди.
CNN маълумотларига кўра, ушбу ўзгартиришлар Шимолий Кореянинг атом қуроллари арсеналини оширишини ва бундан буён ўзини тўлақонли ядровий давлат деб билишини назарда тутади. Тузатишлар икки кунлик муҳокамадан сўнг қабул қилинди.
Телеканал қайд этишича, бу қарор КХДРнинг аввал Ким Чен Ин эълон қилган позициясини мустаҳкамлайди: Шимолий Корея ядро қуролига “абадий” эгалик қилмоқчи, Жанубий Корея, АҚШ ва Ғарб давлатларининг талабига қарамай, ундан воз кечиш ниятида эмас.
Аввалроқ Ким Чен Ин АҚШ, Япония ва Жанубий Корея ўртасидаги ҳамкорлик КХДР учун “энг ёмон таҳдид” эканини маълум қилганди. Тузатишлар қабул қилинган Олий халқ ассамблеясида Ким ядровий мақомнинг тан олинишини Шимолий Кореянинг мудофаа қобилиятини оширадиган ва миллий манфаатларни ҳимоя қиладиган тарихий воқеа деб атади.
Шимолий Корея охирги марта 2017 йилда ядро синовларини ўтказган. 2018 йилда Ким Чен Ин АҚШнинг ўша пайтдаги президенти Дональд Трамп билан музокараларда иштирок этган, музокаралар давомида Шимолий Кореянинг атом бомбаларини ишлаб чиқишдан воз кечиши эҳтимоли муҳокама қилинган, бироқ келишувларга эришилмаган.
Изоҳ (0)