Ўзбекистонда беғараз донорлик ҳаракати учун янги имтиёзлар жорий этилиши кутилмоқда.
Сенатнинг ялпи мажлисида “Донорлик ҳаракатини қўллаб-қувватлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги қонун муҳокама қилиниб, маъқулланганди. Донорлик ҳаракатини қўллаб-қувватлаш тизимини такомиллаштиришга қаратилган қонун лойиҳаси 21 январь куни Қонунчилик палатаси мажлисида учинчи ўқишда қабул қилинганди.
Қонун билан бир қатор янгиликлар жорий этилмоқда. Хусусан, “Ўзбекистон Республикаси фахрий донори” кўкрак нишони билан тақдирланган шахс учун бир йўла бериладиган пул мукофоти БҲМнинг 15 баравари — 5 миллион 625 минг сўм этиб белгиланмоқда (муқаддам БҲМнинг 5 баравари 1 миллион 875 минг сўм миқдорида бўлган).
Ушбу кўкрак нишони билан тақдирланган донорларга ўзлари учун қулай бўлган вақтда ҳар йилги меҳнат таътилига чиқиш, шаҳар йўловчилар транспортидан (йўналишли ва йўналишсиз таксилардан ташқари) бепул фойдаланиш, санаторий-курортларда даволаниш учун йўлланмаларни навбатсиз олиш ҳуқуқи берилиши белгилаб қўйилмоқда.
Маҳаллий давлат ҳокимияти органларига ўз ваколатлари доирасида аҳоли орасида беғараз донорлик маданиятини шакллантириш, уни кенг жамоатчилик иштирокида ривожлантириш, донорларга сифатли хизматлар кўрсатиш ва улар учун қулай шарт-шароитлар яратиш чораларини кўриш каби вазифалар юклатилмоқда.
Ушбу қонун донорларни қўллаб-қувватлаш ва рағбатлантиришнинг қўшимча ҳуқуқий асосларини яратиш орқали аҳоли орасида беғараз донорлик маданиятини шакллантиришга хизмат қилади.
Аҳоли орасида беғараз донорлик ҳаракати ривожлантирилиши президентнинг 2022 йил августдаги “Республикада қон билан ишлаш хизмати муассасалари фаолиятини янада такомиллаштириш ва аҳоли орасида беғараз донорлик ҳаракатини ривожлантириш чоралари тўғрисида”ги қарорида белгиланганди.
Ўзбекистонда донор қон плазмасидан дори воситаларини ишлаб чиқаришга ҳам рухсат берилган. Президентнинг “2022–2026 йилларда республиканинг фармацевтика тармоғини жадал ривожлантиришга оид қўшимча чора-тадбирлар тўғрисида” фармони билан донор қонини тўплаш ва унинг асосида фармацевтика маҳсулотларини хусусий тартибда ишлаб чиқаришга тақиқ бекор қилинган.
Изоҳ (0)