Соғлиқни сақлаш вазирлиги тизимда жорий йилнинг ўтган 6 ойида хотин-қизларнинг соғлиғини сақлаш бўйича амалга оширилган ишлар тўғрисида маълумот берди.
Қайд этилишича, 643 минг нафар хотин-қиз скрининг текширувларидан ўтказилиб, касалликлар аниқланган 3214 нафаридан 2983 нафари (93 фоизи) соғломлаштирилган. Пренатал ультратовуш текширувидан ўтказилган 333,5 минг нафар бўлажак онанинг 7,9 минг нафарида ҳомиласида нуқсон ва акушерлик патологияси аниқланиб, зарур чоралар кўрилган.
Тошкент шаҳрининг барча туғуруқхоналарида чақалоқларда эшитиш нуқсонларини эрта аниқлашга қаратилган аудиоскрининг жорий этилган. Шу йил 1 июлдан бошлаб болалар, ҳомиладор ва бола эмизувчи аёлларни махсус профилактик дори-дармонлар, 3-15 ёшдаги болаларни ёд препарати билан бепул таъминлашга киришилган.
Республика «Она ва бола скрининги» маркази 38,4 миллион сўмлик гематологик анализаторлар, Нукус, Бухоро, Самарқанд, Фарғона «Она ва бола скрининги» марказлари эса 1,1 миллирд сўмлик рақамли микроскоплар ҳамда лаборатория ускуналари билан таъминланган.
Йил якунига қадар:
- 2,3 миллион нафар хотин-қиз бирламчи онкологик скрининг текширувидан, 18 ёшгача бўлган 11 миллион нафардан зиёд болалар эса педиатр, стоматолог, эндокринолог ва ортопед кўригидан ўтказилади;
- барча туғиш ёшидаги аёлларнинг ягона электрон базаси яратилади;
- 400 минг нафар ҳомиладор ва бола эмизувчи аёллар ҳамда 4 миллион нафар 3-15 ёшдаги ўғил-қизлар ёд препарати билан таъминланади;
- 2 миллион нафар 15-35 ёшгача туғиш ёшидаги аёллар темир ва фолий кислотаси препарати билан таъминланади;
- спинал мушак атрофияси ташхиси қўйилган 75 нафар болага зарур дори воситалари етказиб берилади.
Изоҳ (0)