Ўзбекистонда бир йилда ишлаб чиқариладиган қон ҳажми 150 минг литрга етказилади. Бу ҳақда Соғлиқни сақлаш вазирлиги матбуот хизмати хабар бермоқда.
Президент қарорига кўра, 2026 йил 1 январга қадар йиллик донациялар сони 350 мингтага, ҳар минг аҳолига донациялар кўрсаткичи 10 тага, қон тайёрлашда мобил сайёр гуруҳлар улуши 50 фоизга етказилади.
Қон билан ишлаш хизмати муассасалари томонидан бир йилда ишлаб чиқариладиган қон ҳажми 150 минг литрга, эритроцитлар массаси 75 минг литрга, плазма ҳажми 60 минг литрга, албумин ҳажми 1000 литрга, иммуноглобулин ҳажми 2 минг дозага етказилади.
2024 йил 1 январга қадар қон билан ишлаш хизмати муассасаларида донорлар қонида гемотрансмиссив инфекциялар мавжудлигини икки босқичда текшириш (ИФА/ПЗР) амалиёти йўлга қўйилади. 2022—2024 йиллар давомида қон билан ишлаш хизмати муассасалари 15 та ситаферез аппарати, 15 та қонни қайта ишлаш учун рефрижераторли центрифуга, 7 та тезкор контактли музлаткич, 15 та тўлиқ автомат иммунофермент (ИФА/ИХЛА) анализатори, 14 та ПЗР анализатори ва 13 та кўчма донорлик комплекси билан жиҳозланади.
Етарли ҳажмда қон компонентлари захирасини яратиш мақсадида қон билан ишлаш хизмати муассасалари зарур миқдордаги гемоконтейнерлар билан таъминланади ва уларнинг марказлашган харидини ташкил қилади. Бунда 2023 йилда жами харид қилинган гемоконтейнерларнинг 50 фоизини, 2024 йилда 75 фоизини ва 2025 йилда 100 фоизини лейкофильтрли гемоконтейнерлар ташкил этади.
Қон билан ишлаш хизмати муассасаларини жиҳозлаш билан боғлиқ сарф-харажатлар 2022 йилда Ўзбекистон бюджетидан Соғлиқни сақлаш вазирлигига биринчи даражали бюджет маблағларини тақсимловчи сифатида ажратиладиган маблағлар доирасида, 2023 йилдан бошлаб эса давлат бюджети параметрларида кўзда тутилган маблағлар ҳисобидан амалга оширилади.
Изоҳ (0)