“Авваллари донорликни тарғиб қилиш учун идора ва ташкилотларга борсак, ичкарига киритишмасди” — Республика қон қуйиш маркази директори Аълонур Саидов
Маълумотларга кўра, Ўзбекистон донорлик, яъни қон топшириш кўрсаткичи анча паст давлатлар қаторига киради. ЖССТнинг тавсияси бўйича аҳолига қон етарли бўлиши учун мингта аҳолига ўнта донор бўлиши керак. Рақамларга қаралса, 2021 йилда мамлакатда мингта одамга 7 та донор тўғри келган. Ушбу муаммоларни бартараф этиш мақсадида президент Шавкат Мирзиёев 2022 йил август ойида “Республикада қон билан ишлаш хизмати муассасалари фаолиятини янада такомиллаштириш ва аҳоли орасида беғараз донорлик ҳаракатини ривожлантириш чоралари тўғрисида”ги қарори имзоланган.
Республика қон қуйиш маркази директори Аълонур Саидовнинг “Дарё” нашрига берган интервьюсида айтишича, қарорда биринчи навбатда қон хизматининг моддий техник базасини ва Ўзбекистонда беғараз донорлик ҳаракатларини ривожлантиришга қаратилган.
“Бу ерда ҳам иккита асосий томон олиняпти ва бизни қувонтирадиган ҳолат бўлдики, биринчи навбатда донорликни ривожлантириш, донорлик маданиятини шакллантиришга урғу берилди.
Оддий келиб, қон топшириш эмас, донорлик маданияти бўлиши керак. Донорларнинг ахлоқи, ўзига бўлган талаби, қон хизмати билан ўртасидаги муносабат, донорликни тарғиб қилувчи волонтёрлар бор. Шуларнинг орасидаги муносабатлар, қонунан ривожлантириб, жамиятда ҳар битта қатламнинг, ҳар битта одамнинг, ҳар битта раҳбарнинг вазифалари шу ерда кўрсатиб ўтилган”, — деди марказ раҳбари.
Унинг алоҳида таъкидлашича, авваллари донорликни тарғиб қилишга кўплаб идора ва ташкилотларнинг раҳбарлари тўсқинлик қилган.
“Ташкилотлар эшигига донорликни тарғиб қилиш учун борсак, ҳатто ичкарига киритишмас эди. Президентимизнинг қарорлари билан мана шу масалалар ечилди. Эндиликда раҳбарлар ушбу масалага бевосита масъул этиб белгиланди”, — деди Аълонур Саидов.
Мавзуга доир:
- Ўзбекистонда фахрий донорларга бериладиган мукофот пули оширилади
- Эндокринологлар огоҳлантиради: қалқонсимон без ҳақида 3 та муҳим факт
