Андижон шаҳар тиббиёт бирлашмасининг марказий шифохонасида мураккаб трансплантация жарроҳлик амалиёти ўтказилди. Унда 60 ёшли эркак 33 ёшли қизига, шунингдек, 37 ёшли аёл турмуш ўртоғига донорлик қилди. Бу ҳақда «Дарё» мухбири Умиджон Мамарасулов хабар бермоқда.
Вилоят соғлиқни сақлаш бошқармаси ахборот хизмати раҳбари Муфаззалшоҳ Муҳаммадиевнинг аниқлик киритишича, Андижон вилоятидаги соғломлаштириш акциясида мураккаб трансплантация операциялари ҳам ўтказилган.
«Сурункали буйрак етишмовчилиги билан касалланган беморларнинг кун тартиби, ҳаёт сифати бошқа беморларникидан анчайин фарқ қилади. Уларнинг аксарияти гемодиализ муолажасини олиб юришга мажбур. Акс ҳолда касаллик зўрайиб, бемор қийин аҳволда қолиши ҳеч гап эмас. Жорий йилнинг апрель ойида Республика ихтисослаштирилган хирургия илмий-амалий тиббиёт маркази қон-томир жарроҳлиги ва буйрак трансплантацияси бўлими раҳбари, тиббиёт фанлари доктори Фазлиддин Баҳритдинов бошчилигидаги бригада вилоятимизнинг малакали шифокорлари ҳамроҳлигида икки босқичли операцияни ўтказишган эди. Унда 29 ёшли уканинг бир буйраги 37 ёшли бемор акасига кўчириб ўтказилди. Акция доирасида уларнинг саломатлиги яна бир қатор текширилиб, керакли тавсиялар берилди. Шундан сўнг буйрак етишмовчилиги билан азият чекаётган яна икки нафар беморда мана шундай операциялар ўтказилди», — дейди Муфаззалшоҳ Муҳаммадиев.
Таъкидланишича, Балиқчи туманида яшовчи 33 ёшли Гулмира Бобомирзаева ана шундай беморлардан. Шифокорлар кўригидан сўнг, беморнинг отаси, 60 ёшли Насимжон Маҳмудов ўз жигарбандига бир буйрагини беришга қарор қилган. Пойтахтдан келган етакчи шифокорлар ва маҳаллий мутахассислар иштирокида отанинг бир буйраги қизига ўтказилган. Тўрт соат давом этган операция эса муваффақиятли якунланиб, бемор яна ҳаётга қайтган.
39 ёшли Акмал Зокиров ҳам 37 ёшли турмуш ўртоғининг донорлиги эвазига соғлиғини тиклаб олмоқда.
«Ҳаёт турли синовлардан иборат экан. Иш ва оила ташвишлари билан бўлиб, саломатлигимга бееътибор қолибман. Доимий спорт билан шуғулланаман-ку деб кўнглим хотиржам эди. Тўғриси жорий йилнинг февраль ойигача соғлигимда ҳеч қандай салбий ҳолатларни сезмагандим. Ўшанда спорт машғулотлари пайти эди. Нимадир бўлиб ҳушимдан кетганимни биламан ўзимга келганимда шифохонада ётгандим. Шифокорлар зудлик билан тиббий текширувлардан ўтказишди. Ачинарлиси менда ўткир бурак етишмовчилиги аниқланди. Мана шундан кейин жиддий даволанишни бошладим. Чуқур текширишлардан ўтказилгач, пойтахтлик шифокорлар буйрак трансплантацияси амалиётини тавсия қилишди. Шунда турмуш ўртоғим Шоҳидахон бир буйрагини менга беришини айтди. Бунинг учун ундан мингдан минг розиман», — дейди 39 ёшли Акмал Зокиров.
Изоҳ (0)