Фарғонада академик Воҳидов номидаги Республика ихтисослаштирилган хирургия илмий-амалий тиббиёт маркази мутахассислари ва маҳаллий шифокорлар ҳамкорлигида риштонлик 24 ёшли бемор М.А.га 48 ёшли онаси М.А.нинг бир буйраги кўчириб ўтказилди.
Пойтахтдан келган малакали жарроҳ, тиббиёт фанлари доктори, профессор Фазлиддин Фахриддинов бошчилигида бажарилган мазкур амалиёт қарийб 3 соат давом этди.
Бемор бир неча йилдан буён юқори қон босими, иштаҳа пасайиши, пешоб йўлидаги хасталиклардан жиддий азият чекиб келган. Ўтказилган тиббий текширувлар натижасида унга сурункали гломерулонефрит ва иккиламчи буйрак етишмовчилиги ташхиси қўйилган. Айни вақтга келиб, ташхис терминал босқичга ўтгани сабабли уни ҳаётга қайтаришнинг ягона усули сифатида буйрак кўчириб ўтказиш амалиёти тавсия этилган.Шу боис донорлик учун беморнинг барча оила аъзолари таҳлил натижалари олиниб, онаси М.А.нинг кўрсаткичлари донорлик учун мос келди. Бир йиллик тайёргарликдан сўнг ушбу амалиёт муваффақиятли бажарилди, — дейди вилоят кўп тармоқли тиббиёт маркази бош шифокори Одил Умаров.
Худди шандай амалиёт Республика шошилинч тиббий ёрдам илмий маркази Қашқадарё филиалида ҳам ўтказилди. Косонлик 45 ёшли бемор аёл Х.Ҳ. 13 йилдан буён сурункали гломерулонефрит касаллигидан азият чекиб келган. Саккиз ойдан буён гемодиализ муолажаларини олиб келаётган беморга турмуш ўртоғи бир буйрагини берди.
Республика шошилинч тиббий ёрдам илмий маркази хирургия бўлими бошлиғи, тиббиёт фанлари доктори, профессор Фарҳод Хаджибаев раҳбарлигидаги гуруҳ ва маҳаллий мутахассислар иштирокида ўтказилган операция муваффақиятли бажарилди. Қашқадарё вилоятида илк буйрак кўчириб ўтказиш амалиёти март ойида бажарилган эди.
Изоҳ (0)