O‘zbekistonda beg‘araz donorlik harakati uchun yangi imtiyozlar joriy etilishi kutilmoqda.
Senatning yalpi majlisida “Donorlik harakatini qo‘llab-quvvatlash tizimi takomillashtirilishi munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida”gi qonun muhokama qilinib, ma’qullangandi. Donorlik harakatini qo‘llab-quvvatlash tizimini takomillashtirishga qaratilgan qonun loyihasi 21-yanvar kuni Qonunchilik palatasi majlisida uchinchi o‘qishda qabul qilingandi.
Qonun bilan bir qator yangiliklar joriy etilmoqda. Xususan, “O‘zbekiston Respublikasi faxriy donori” ko‘krak nishoni bilan taqdirlangan shaxs uchun bir yo‘la beriladigan pul mukofoti BHMning 15 baravari — 5 million 625 ming so‘m etib belgilanmoqda (muqaddam BHMning 5 baravari 1 million 875 ming so‘m miqdorida bo‘lgan).
Ushbu ko‘krak nishoni bilan taqdirlangan donorlarga o‘zlari uchun qulay bo‘lgan vaqtda har yilgi mehnat taʼtiliga chiqish, shahar yo‘lovchilar transportidan (yo‘nalishli va yo‘nalishsiz taksilardan tashqari) bepul foydalanish, sanatoriy-kurortlarda davolanish uchun yo‘llanmalarni navbatsiz olish huquqi berilishi belgilab qo‘yilmoqda.
Mahalliy davlat hokimiyati organlariga o‘z vakolatlari doirasida aholi orasida beg‘araz donorlik madaniyatini shakllantirish, uni keng jamoatchilik ishtirokida rivojlantirish, donorlarga sifatli xizmatlar ko‘rsatish va ular uchun qulay shart-sharoitlar yaratish choralarini ko‘rish kabi vazifalar yuklatilmoqda.
Ushbu qonun donorlarni qo‘llab-quvvatlash va rag‘batlantirishning qo‘shimcha huquqiy asoslarini yaratish orqali aholi orasida beg‘araz donorlik madaniyatini shakllantirishga xizmat qiladi.
Aholi orasida beg‘araz donorlik harakati rivojlantirilishi prezidentning 2022-yil avgustdagi “Respublikada qon bilan ishlash xizmati muassasalari faoliyatini yanada takomillashtirish va aholi orasida beg‘araz donorlik harakatini rivojlantirish choralari to‘g‘risida”gi qarorida belgilangandi.
O‘zbekistonda donor qon plazmasidan dori vositalarini ishlab chiqarishga ham ruxsat berilgan. Prezidentning “2022–2026-yillarda respublikaning farmatsevtika tarmog‘ini jadal rivojlantirishga oid qo‘shimcha chora-tadbirlar to‘g‘risida” farmoni bilan donor qonini to‘plash va uning asosida farmatsevtika mahsulotlarini xususiy tartibda ishlab chiqarishga taqiq bekor qilingan.
Izoh (0)