Андижонлик аёлнинг фарзанди нобуд бўлгани хабар берилганди. Масъуллар ҳолат ҳақида маълумот берди

Ижтимоий тармоқларда Андижон вилоятининг Избоскан туманида яшовчи аёлнинг фарзанди нобуд бўлгани ҳамда аёлда бир неча маротаба жарроҳлик амалиёти ўтказилгани хабар тарқалди. Вилоят соғлиқни сақлаш бошқармаси томонидан ушбу ҳолат юзасидан муносабат билдирди.

Таъкидланишича, 1992 йил туғилган Ж.Н. 2022 йилнинг 1 октябрь куни соат 14:40 да Избоскан туман тиббиёт бирлашмасининг туғуруқ мажмуасига қабул қилинган. 2018 йилда кесар кесиш операциясини ўтказган ҳомиладор аёлда 3-4 кун давомида кўнгил айниши, тана ҳароратининг 38 градусгача кўтарилиши кузатилган.

2022 йил 4 октябрь куни соат 17:00 да туғуруқ мажмуи мудири ҳомиладор аёлни тиббий кўрикдан ўтказган. Шунга кўра, ҳолатига қараб, ҳомиладорликни табиий туғруқ билан эмас, жарроҳлик амалиёти билан амалга оширишни режалаштирган. Аёлни амалиётга тайёрлаш учун интенсив даво муолажалари тавсия қилинган. Операцияга тайёрлаш учун анестезиолог, терапевт ва бошқа мутахассислар кўриги, организмни операцияга тайёрлаш учун инфузион-инекцион дори муолажалари ўтказилган. Шундан сўнг, 5 октябрь куни соат 08:45 да кесарча кесиш йўли билан ундан ўғил жинсли ўлик ҳомила (4 кило 650 грамм вазнда) олинган. Ҳомилани ҳаётга қайтариш учун олиб борилган реанимацион чоралар фойдасиз бўлган.

«Аёлнинг саломатлиги ҳам ижобий бўлмаган, тери ранги сарғайиш белгилари пайдо бўлгани сабабли туман бош инфекционисти томонидан вирусли гепатит В ташхисига гумон қилиниб, қўшимча текширувлар тавсия қилинган. Беморнинг умумий ҳолати ҳисобга олиниб, санитар авиация орқали вилоятдан акушер-гинеколог, инфекционист мутахассислари чақирилиб, маслаҳатлари олинган. 7 октябрь куни малакали ихтисослашган тиббий ёрдам кўрсатиш мақсадида вилоятдаги бош мутахассислар билан маслаҳатлашиб, Республика шошилинч тиббий ёрдам илмий амалий маркази Андижон филиалига ўтказилган. 9 октябрь куни эса беморнинг умумий аҳволи ўзгаришсиз қолган, қорнида перитонеал белгилар бўлган. Шунингдек, гемотрансфузия, плазмотрансфузия амалга оширилаётганлиги сабабли туман тиббиёт бирлашмаси кўп тармоқли марказий поликлиникаси Лўғумбек бўлимининг кўнгилли тиббиёт ходимлари томонидан 10 октябрь куни уч нафар қон донорлари вилоят Қон қуйиш марказига жалб этилган. Яна 10 нафар тиббиёт ходимлари кўнгилли равишда аёл учун донорлик-қон бериш истагини билдирган», — дейди масъуллар.

Қўшимча қилинишича, айни пайтда беморнинг умумий ҳолати стабил оғир. Қон ивиш хусусиятининг тарқалган бузилиши асорати кузатилмоқда. Тиббиёт ходимлари томонидан ҳаётини сақлаб қолиш бўйича барча тадбирлар ўтказилмоқда. Натижада саломатлик ҳолатида ижобий ўзгаришлар намоён бўлмоқда. Бемор саломатлиги вилоят соғлиқни сақлаш бошқармаси бошлиғининг шахсий назоратига олинган.