Самарқанд вилоят кўп тармоқли тиббиёт марказида биринчи маротаба марказ трансплантологлари ва Самарқанд давлат тиббиёт университети ходимлари ҳамкорликда жигар кўчириб ўтказиш амалиёти ўтказилди. Бу ҳақда «Дарё»га вилоят соғлиқни сақлаш бошқармаси ахборот хизмати маълум қилди.
1965 йилда туғилган бемор Саодат Лапасова жигар сиррози, субкомпенсация босқичи билан касалланган бўлиб, унга 1987 йилда туғилган қизи Нафиса Қурбонова донорлик қилган.
9 август куни бўлиб ўтган операция 13 соат 20 дақиқа давом этган. Операцияда 25 нафарга яқин тиббиёт ходимлари иштирок этган.
«Биз мураккаб амалиётни муваффақиятли якунладик. Бу Самарқанд тиббиётида яна бир янгилик бўлди. Жигар трансплантацияси амалиётини бажаришга ҳар томонлама пухта тайёргарлик кўрдик. Бунинг учун ходимларимиз Москва, Қозон, Киев, Истанбул, Анқара шаҳарларида малака ошириб келди. Қолаверса, академик Воҳидов номидаги Республика хирургия илмий амалий марказининг профессор ходимлари бизни қўллаб-қувватлади. Бемор Лапасовада жигар сиррози, субкомпенсация босқичи эди. Шукрки, мазкур амалиёт муваффақиятли ўтди. Ҳозиргача бўлган текширув натижаларнинг барчаси ижобий», — дейди вилоят кўп тармоқли тиббиёт маркази бош врачи, Самарқанд давлат тиббиёт университети кафедраси мудири Лутфулло Маҳмонов.
Лутфулло Маҳмоновнинг таъкидлашича, марказлашган ҳолда ва вилоят ҳокимлиги ҳомийлиги остида инсон органларини кўчириб ўтиш амалиётлари учун марказга 10 миллиард сўмлик тиббий асбоб ускуналар олиб келиб ўрнатилган.
Изоҳ (0)