Наманганда ўтказилган буйрак трансплантацияси операциясида 35 яшар аёл турмуш ўртоғига донор бўлди. Бу ҳақда «Дарё» мухбири Азизбек Абдувалиев хабар бермоқда.
Республика шошилинч тиббий ёрдам илмий маркази шошилинч хирургия ва хирургик трансплантология бўлими раҳбари, тиббиёт фанлари доктори, профессор Фарҳод Ҳожибоев бошчилигидаги 12 нафар мутахассис томонидан РШТЯИМ Наманган филиалида маҳорат дарслари ўтказилди. Маҳорат дарсининг амалий қисмида сурункали буйрак етишмовчилиги касаллигига чалинган ва беш йилдан бери гемодиализ олиб юрган 37 ёшли эркак беморда буйрак трансплантацияси амалга оширилди. Унга турмуш ўртоғи, 4 нафар фарзанднинг онаси бўлган 35 яшар аёл донорлик қилди.
«Қарийб 4, 5 соат давом этган мураккаб операция муваффақиятли якунланди. Ҳозирда донор ва беморнинг аҳволи қониқарли. Уларга бир ҳафтадан сўнг уйларига жавоб берсак керак», — дейди РШТЯИМ Наманган филиали Аброр Алижонов.
Ушбу амалиёт РШТЯИМ Наманган филиалида илк бор бажарилди. Аброр Алижоновнинг қайд этишича, келгусида бундай операциялар филиалда тўлиқ йўлга қўйилади. Бунинг учун 8 нафар маҳаллий мутахассис танлаб олинган. Улар аввал Тошкентда, сўнг хорижда малака ошириб қайтиши кўзда тутилмоқда.
Изоҳ (0)