Самарқандда илк бор жигар кўчириш операцияси бажарилгани, 35 ёшли қиз 57 ёшли онасига донорлик қилгани хабар берилганди. Мазкур амалиётдан бир неча кун ўтиб, бемор ҳам донор ҳам шифохонада вафот этгани хабар берилди. Вилоят соғлиқни сақлаш бошқармаси ахборот хизмати «Дарё»га шу ҳақда қўшимча ахборот берди.
Маълум бўлишича, 57 ёшли бемор сўнгги тўрт йил давомида вилоят кўп тармоқли тиббиёт марказида жигар сиррози касаллигидан даволаниб келган. Аммо саломатлиги борган сари ёмонлашиши туфайли у жорий йил 27 июль куни жарроҳлик бўлимига ётқизилган. Беморда стандарт асосида бажарилган текширувлардан кейин операция олди консерватив терапияси ўтказилган.
Жигар трансплантациясидан аввал бемор, донор ва унинг қариндошлари билан биргаликда қонунчиликда белгиланган ва қонуности ҳужжатларида кўрсатилган стандартлар асосида иш юритилган.
13 соату 20 дақиқа давом этган жарроҳлик амалиётидан сўнг бемор реанимация бўлимига ўтказилиб, интенсив даво муолажалари давом эттирилган. Бироқ дастлабки таҳлилларга қараганда, стабил оғир аҳволдаги ушбу фуқаро 12 августда ўткир юрак-қон томирлари етишмовчилиги туфайли вафот этган.
Беморга донорлик қилган 35 ёшли қизи стандарт асосида текширилиб, трансплантация қилинган. Операциядан сўнг унда интенсив даво муолажалари олиб борилган.
«Аммо донорда буйрак етишмовчилиги, икки томонлама зотилжам асорати кузатилиб, стандарт бўйича интенсив даво чоралари қўлланилган. Шунга қарамай, умумий ҳолати яхшиланиб бораётган беморнинг аҳволи 16 август куни бирдан ёмонлашиб, юрак уриши тўхтаган. Реанимацион тадбирлар ўтказилишига қарамасдан, унда биологик ўлим кузатилди», — дейди вилоят Соғлиқни сақлаш бошқармаси ахборот хизмати вакили.
Мутахассисларнинг таъкидлашича, донорда ўпка томирларининг тромбоэмболияси асорати кузатилганлиги гумон қилинган. Ҳолат юзасидан ҳуқуқ-тартибот идоралари ходимлари томонидан тергов-суриштирув ишлари олиб борилмоқда.
Изоҳ (0)