Тошкентдан Жиддага учаётган самолёт фавқулодда Баҳрайнга қўнди, деб хабар бермоқда Air Samarkand авиакомпанияси.
Маълум қилинишича, UZS4003 Тошкент—Жидда рейси бортда юзага келган фавқулодда тиббий ҳолат сабабли Баҳрайн аэропортига мажбурий қўнишни амалга оширди. Парвоз давомида 75 ёшли йўловчида такрорий инфаркт содир бўлди.
Самолёт бортида бўлган шифокор беморнинг ҳаёти хавф остида эканини тасдиқлади. Ҳаво кемаси командири Таланов Роман Игоревич бошчилигидаги Air Samarkand экипажи тезкор қарор қабул қилиб, беморга зарурий тиббий ёрдам кўрсатиш учун Баҳрайнга фавқулодда қўнишга қарор қилди.
Бош борткузатувчи Шишкина Алена бошчилигидаги борт кузатувчилари шифокор билан биргаликда бортдаги тиббий қутилар ва ускуналар ёрдамида беморга биринчи ёрдам кўрсатди. Аэропортда бемор барқарор ҳолатда тез ёрдам бригадасига топширилди.
Рейс тахминан 1 соат кечикиш билан Жиддага давом этади.
Бундан аввал 2025 йил 28 январь куни Uzbekistan Airways’нинг HY101 рейси (Тошкент—Нью Йорк) Исландиянинг Кефлавик шаҳридаги захира аэродромига мажбурий қўнишни амалга оширган эди. Маълум қилинишича, бунга парвоз давомида йўловчилардан бирида туғуруқ бошлангани сабаб бўлган. Йўловчи ўғил фарзандини дунёга келтирган. Самолёт муваффақиятли қўнганидан сўнг, тиббиёт ходимлари бортга кўтарилиб, зарур ёрдам кўрсатган. Она ва чақалоқ маҳаллий клиникага етказилган.
Uzbekistan Airways матбуот хизмати компания самолётида 15 январь куни носозлик кузатилганини маълум қилганди. Қайд этилишича, Внуково халқаро аэропортида ҳаво кемасида техник носозлик вужудга келган. Шу сабабли Uzbekistan Airways авиакомпаниясининг бир нечта авиақатновлари мажбурий кечиктирилган. Бортида 132 йўловчи бўлган самолёт аэропортга қўнаётганда двигателлардан бири ишдан чиққан. Қўниш муваффақиятли амалга оширилган.
Шунингдек, 1 февраль куни Centrum Air авиакомпаниясининг C63336 рақамли рейсида Мадинадан Фарғонага учаётган A321neo самолёти Марида (Туркманистон) мажбурий қўнишни амалга оширган.
Изоҳ (0)