Toshkentdan Jiddaga uchayotgan samolyot favqulodda Bahraynga qo‘ndi, deb xabar bermoqda Air Samarkand aviakompaniyasi.
Ma’lum qilinishicha, UZS4003 Toshkent—Jidda reysi bortda yuzaga kelgan favqulodda tibbiy holat sababli Bahrayn aeroportiga majburiy qo‘nishni amalga oshirdi. Parvoz davomida 75 yoshli yo‘lovchida takroriy infarkt sodir bo‘ldi.
Samolyot bortida bo‘lgan shifokor bemorning hayoti xavf ostida ekanini tasdiqladi. Havo kemasi komandiri Talanov Roman Igorevich boshchiligidagi Air Samarkand ekipaji tezkor qaror qabul qilib, bemorga zaruriy tibbiy yordam ko‘rsatish uchun Bahraynga favqulodda qo‘nishga qaror qildi.
Bosh bortkuzatuvchi Shishkina Alena boshchiligidagi bort kuzatuvchilari shifokor bilan birgalikda bortdagi tibbiy qutilar va uskunalar yordamida bemorga birinchi yordam ko‘rsatdi. Aeroportda bemor barqaror holatda tez yordam brigadasiga topshirildi.
Reys taxminan 1 soat kechikish bilan Jiddaga davom etadi.
Bundan avval 2025-yil 28-yanvar kuni Uzbekistan Airwaysʼning HY101 reysi (Toshkent—Nyu York) Islandiyaning Keflavik shahridagi zaxira aerodromiga majburiy qo‘nishni amalga oshirgan edi. Maʼlum qilinishicha, bunga parvoz davomida yo‘lovchilardan birida tug‘uruq boshlangani sabab bo‘lgan. Yo‘lovchi o‘g‘il farzandini dunyoga keltirgan. Samolyot muvaffaqiyatli qo‘nganidan so‘ng, tibbiyot xodimlari bortga ko‘tarilib, zarur yordam ko‘rsatgan. Ona va chaqaloq mahalliy klinikaga yetkazilgan.
Uzbekistan Airways matbuot xizmati kompaniya samolyotida 15-yanvar kuni nosozlik kuzatilganini maʼlum qilgandi. Qayd etilishicha, Vnukovo xalqaro aeroportida havo kemasida texnik nosozlik vujudga kelgan. Shu sababli Uzbekistan Airways aviakompaniyasining bir nechta aviaqatnovlari majburiy kechiktirilgan. Bortida 132 yo‘lovchi bo‘lgan samolyot aeroportga qo‘nayotganda dvigatellardan biri ishdan chiqqan. Qo‘nish muvaffaqiyatli amalga oshirilgan.
Shuningdek, 1-fevral kuni Centrum Air aviakompaniyasining C63336 raqamli reysida Madinadan Farg‘onaga uchayotgan A321neo samolyoti Marida (Turkmaniston) majburiy qo‘nishni amalga oshirgan.
Izoh (0)