1-fevral kuni Centrum Air aviakompaniyasining C63336 raqamli reysida Madinadan Farg‘onaga uchayotgan A321neo samolyoti Marida (Turkmaniston) majburiy qo‘nishni amalga oshirdi.
Aviakompaniya matbuot xizmati ma’lum qilishicha, bunga sabab dvigatelda moy sizib chiqishi bo‘lgan.
Mariga xuddi shu turdagi A321neo zaxira samolyoti jo‘natilgan va u yo‘lovchilar hamda ularning yuklarini Farg‘onaga yetkazib bergan.
Centrum Air muhandislar jamoasi dvigatelda moy sizib chiqishini bartaraf etdi, samolyot yaqin vaqt ichida yo‘lovchilarsiz Toshkentga texnik parvozni amalga oshiradi, deyiladi xabarda.
28-yanvar kuni Uzbekistan Airwaysʼning HY101 reysi (Toshkent—Nyu York) Islandiyaning Keflavik shahridagi zaxira aerodromiga majburiy qo‘nishni amalga oshirgan edi. Maʼlum qilinishicha, bunga parvoz davomida yo‘lovchilardan birida tug‘uruq boshlangani sabab bo‘lgan. Yo‘lovchi o‘g‘il farzandini dunyoga keltirgan. Samolyot muvaffaqiyatli qo‘nganidan so‘ng, tibbiyot xodimlari bortga ko‘tarilib, zarur yordam ko‘rsatgan. Ona va chaqaloq mahalliy klinikaga yetkazilgan.
Uzbekistan Airways matbuot xizmati kompaniya samolyotida 15-yanvar kuni nosozlik kuzatilganini maʼlum qilgandi. Qayd etilishicha, Vnukovo xalqaro aeroportida havo kemasida texnik nosozlik vujudga kelgan. Shu sababli Uzbekistan Airways aviakompaniyasining bir nechta aviaqatnovlari majburiy kechiktirilgan. Bortida 132 yo‘lovchi bo‘lgan samolyot aeroportga qo‘nayotganda dvigatellardan biri ishdan chiqqan. Qo‘nish muvaffaqiyatli amalga oshirilgan.
Izoh (0)