Беларусь президенти Александр Лукашенко 12 февраль куни АҚШ фуқароси ва икки нафар беларуслик сиёсий маҳбусни озод қилди. Бу Вашингтон ва Минск ўртасидаги “катта келишув”га тайёргарлик бўлиши мумкин. Бу ҳақда The New York Times хабар берди.
АҚШ давлат котибининг Европа бўйича ёрдамчиси ўринбосари Крис Смит маҳбусларни олиб чиқиш бўйича “махсус операция”да иштирок этган. У Беларусь пойтахтида Лукашенко ва мамлакат давлат хавфсизлик қўмитаси раҳбари Иван Тертел билан учрашган.
Тайёрланаётган келишув доирасида Лукашенко “кўплаб сиёсий маҳбусларни”, жумладан, кенг жамоатчиликка маълум бўлганларни озод қилиши мумкин. Беларусь раҳбари мамлакат ичидаги репрессияларни юмшатишига ишонтирган.
Бунга жавобан АҚШ санкцияларнинг бир қисмини, масалан, Беларусь банклари ва калий ўғитлари экспортига нисбатан санкцияларнинг бир қисмини бекор қилади, дея таъкидлайди NYT суҳбатдошлари.
Эҳтимолий келишувнинг яна бир мақсади Лукашенкога “Россия таъсир доирасидан ташқарида нафас ростлаш” имкониятини бериш бўлади. Смит АҚШ иттифоқчилари билан Беларусга нисбатан санкцияларни юмшатиш бўйича музокараларни 2024 йилда бошлаган.
Польша ташқи разведка хизмати собиқ раҳбари Пётр Кравчикка кўра, Беларусь “Американинг Россияга нисбатан кенгроқ ёндашувининг бир қисми” ҳисобланади. У Беларусь билан келишув АҚШга Россияга таъсир ўтказиш учун қўшимча воситалар беришини айтмоқда.
12 февраль куни Беларусь ҳукумати “Озодлик радиоси”нинг мустақил журналисти Андрей Кузнечикни, фаол Елена Мовшукни ва исми ошкор этилмаган АҚШ фуқаросини озод қилди. Беларусь мухолифати етакчиси Светлана Тихановскаянинг айтишича, учала шахс ҳам Америка элчихонаси вакиллари кўмагида Вильнюсга жўнаб кетган.
Изоҳ (0)