Навоийга Хитойдан 60 та автобус сотиб олиш бўйича Yutong компанияси вакиллари билан шартнома имзоланди. Бу ҳақда вилоят ҳокимлиги матбуот хизмати хабар берди.
Айни пайтда Навоий вилоятига хитойлик инвесторларни жалб этиш, вилоятнинг инвестицион салоҳиятини намойиш қилиш ҳамда ишлаб чиқарилаётган маҳсулотларни экспорт қилиш мақсадида вилоят раҳбари Нормат Турсунов бошчилигидаги делегация Хитойда хизмат сафарида бўлиб турибди. Сафар 26 январгача давом этиши режалаштирилган.
Сафарнинг илк кунида делегатлар ҳамда Шенжон-Тейжун ишбилармонлар уюшмаси раиси Лин Чинг иштирокида учрашув ташкил этилди. Учрашувда хитойлик инвесторларнинг Навоий вилоятига қизиқиши баланд эканлиги алоҳида таъкидланди.
Хусусан, Навоий вилоятида саноат зонасини ташкил этиш, қурилиш, туризм, транспорт инфратузилмасини ривожлантириш йўналишларида музокаралар олиб борилди. Бугунги кунда йўл-транспорт инфратузилмасини ривожлантириш соҳасида ишлар сифатини ошириш, туризм соҳаси ва аҳолига сифатли ва қулай транспорт хизматларини кўрсатиш жуда муҳим.
Шу боис, музокаралар давомида Навоий шаҳрида жамоат транспорти йўналишлари тармоғини кенгайтириш ва ҳаракат таркибини замонавий, экологик тоза автобуслар билан янгилаш мақсадида Yutong компанияси вакиллари билан 60 та автобус хариди юзасидан шартнома имзоланди.
Изоҳ (0)