Тошкентнинг Яккасарой туманида йўлнинг белгиланмаган қисмидан кесиб ўтаётган пиёда автобус уриб юбориши оқибатида вафот этгани тўғрисида хабар берилганди. Яккасарой туман судида ҳайдовчига нисбатан суд ҳукми ўқилди.
Суд ҳужжатлари билан танишган “Газета.уз”нинг ёзишича, 19 июль куни соат 16:30 да Бобур кўчасида автобус ҳайдовчиси А.Д. чап тизмага ўтаётганда орқани кўрсатувчи чап ойнага қараб, 2−3 сония тўғри йўлга қарамасдан чалғиб қолган. Шу вақт йўлнинг қатнов қисмида белидан тушиб қолган рациясини олиш учун ўтаётган Г.К.ни уриб юборган.
Йўл-транспорт ҳодисаси оқибатида пиёда олган тан жароҳатлари билан тиббий муассасага олиб борилган. Бироқ тиббиёт ходимларининг саъй-ҳаракатларига қарамасдан у вафот этган.
Судда ҳайдовчи қилмишидан пушаймон эканини ва айбига тўлиқ иқрорлигини, шунингдек, пиёданинг оила аъзоларига 8,3 миллион сўм моддий ёрдам берганини маълум қилган. У суддан енгилроқ жазо тайинлашни сўраган.
Судда жабрланувчининг қонуний вакили ва турмуш ўртоғи А.М. унга 70 миллион сўм моддий ва маънавий зарарларни ундириб беришни ва судланувчи А.Д.га нисбатан қонун доирасида жазо тайинлашни сўраб, кўрсатма берган.
Якунда суд судланувчи А.Д.ни Жиноят кодексининг 266-моддаси 2-қисмида (транспорт воситалари ҳаракати ёки улардан фойдаланиш хавфсизлиги қоидаларини бузиш оқибатида одам вафот этиши) назарда тутилган жиноятни содир этганликда айбли деб топган.
Унга нисбатан 2 йил муддатга муайян ҳуқуқдан, яъни транспорт воситаларини бошқариш ҳуқуқидан маҳрум қилган ҳолда 5 йил муддатга озодликдан маҳрум қилиш жазоси тайинланган.
Аввалроқ Тошкентда Yutong автобуси 47 ёшли пиёдани уриб юборгани, Ургутда пиёданинг ўлимига сабабчи бўлган Malibu ҳайдовчисига суд ҳукми ўқилгани тўғрисида хабар берилганди.
Изоҳ (0)