Тошкент шаҳрида ҳаракатланувчи автобуслардан бирида ҳайдовчи ҳаракат давомида сигарет чеккани акс этган видео тарқалди. “Тошшаҳартрансхизмат” ахборот хизмати ҳолат юзасидан маълумот берди.
Хабарга кўра, 28 декабрь куни “Тошшаҳартрансхизмат”нинг йўловчи транспортида ҳаракат хавфсизлигини назорат қилиш ходимлари томонидан тезкор суриштирув ишлари ўтказилганда мазкур қоидабузарлик “18-автобус саройи” филиали тасарруфидаги 87-сонли йўналишда ҳаракатланувчи Yutong русумли автобус ҳайдовчиси И.А. томонидан содир этилгани аниқланди.
Таъкидланишича, “Тошшаҳартрансхизмат”нинг автобус саройларида фаолият олиб бораётган ҳар бир ҳайдовчига йўналишда тартиб-интизомни сақлаш, йўловчи ташиш қоидалари ва маданиятига риоя этиш ва корхонанинг ички меҳнат тартибига амал қилиш, шунингдек, ҳаракат вақтида уяли алоқа телефонидан фойдаланмаслик ва тамаки маҳсулотини истеъмол қилмаслик бўйича йўриқнома ўтказилган бўлиб, ҳар бир ҳайдовчидан юқоридаги талабларга риоя этиши юзасидан кафолат хати олинган.
Ушбу кафолат хатига асосланиб, автобусни бошқариш вақтида тамаки маҳсулотини истеъмол қилиб, корхона ички тартиб қоидаларини бузганлиги учун ҳайдовчига нисбатан “18-автобус саройи” филиали раҳбарияти томонидан қатъий чора кўрилиб, ҳайдовчи И.А. билан тузилган меҳнат шартномаси бекор қилинган.
Изоҳ (0)