Тошкентга Хитойдан 268 та автобус ва электробуслар олиб келинди (видео)

Айни пайтда “Янги Ўзбекистон” боғида Хитойдан олиб келинган 268 та автобус ва электробусларни топшириш маросими бўлиб ўтмоқда. Бу ҳақда “Дарё” мухбири хабар берди.

Қайд этилишича, ушбу жамоат транспорти воситаларининг 101 таси электробус, 109 таси газда ҳаракатланувчи (12 метрли) автобус, 48 таси катта сиғимли (“гармошка”) автобуслардир. Мазкур автобус ва электробуслар King long ва Yutong компаниялари томонидан ишлаб чиқарилган.

“Хитойдан май ойигача жами мингта автобус ва электробуслар олиб келиш режалаштирилган”, — дейди транспорт вазири Илҳом Маҳкамов.

2023 йил 16 февралдаги “Жамоат транспорти тизимини ислоҳ қилиш чора-тадбирлари тўғрисида”ги президент қарорига асосан, Тошкент шаҳри жамоат транспорти учун 200 дона 18 метрли ва 500 дона 12 метрли табиий газда ишлайдиган автобуслар ҳамда 300 дона 12 метрли электробуслар харид қилиш белгиланган.

Хитойнинг Yutong Bus Cо Ltd компанияси ва “Тошшаҳартрансхизмат” ўртасида тузилган шартномага асосан, 2023 йилнинг март ойи якунига қадар Yutong автобусларнинг 1-партияси, яъни 110 дона автобус ва 150 дона электробуслар Ўзбекистонга етказиб берилиши кутилаётгани тўғрисида хабар берилганди.

Давлат раҳбари 13 декабрь куни Учтепа тумани фаоллари билан ўтказилган йиғилишда бош вазирга март ойигача Тошкентга 1000 та автобус олиб келиш бўйича топшириқ берганини айтганди. “Жамоат транспортини ислоҳ қилишимиз зарур. Ютуқлар билан бирга, камчиликларимиз ҳам жуда кўп”, — деганди президент.