Ижара тўлови ва янги машина: машҳурлар биринчи гонорарини нимага сарфлаган?

Ўз меҳнатингиз билан топилган илк маошни  сарфлаш ёқимли. Бу лаҳзани бутун умрга эслаб қолиш учун кўпчилик бу пулга алоҳида бирор нарса харид қилади. Қуйида машҳурлар ўзининг биринчи маошини нимага сарфлагани ҳақида сўзлаб берди.

Брэд Питт

Брэд Питт дизайн ва архитектура санъатига болалигидан қизиқади. 2000 йилларда у турли мебель чизмаларини яратишни бошлаган ва 2010 йилларда ётоқ, кресло, столлар каби мебеллар дизайни билан шуғулланган. Актёрнинг ноодатий дизайндаги мебелларга бўлган қизиқиши шунчалик баланд эдики, у биринчи топган йирик даромадини янги стул ва чироқ сотиб олишга сарфлаган:

Биринчи маошимни олганимда, уни антиқа Craftsman стули ва Фрэнк Ллойд Райт брендига тегишли чироқларга сарфладим, ­— деган эди актёр эски интервьюлардан бирида.

Женнифер Лопес

Шоу-бизнесдаги фаолиятининг бошида Женнифер Лопес Honda хэтчбек бошқарган. Унга машина ҳайдаш ёқмас, ўзининг шахсий ҳайдовчиси бўлишини ва машинасини янгилашни орзу қилган ҳамда бўлажак жаҳон юлдузи биринчи катта маошини машинага сарфлаган:

Илк гонорарим сериалдаги ролим учун берилган эди. Унга Меrcedes-Benz сотиб олдим. Бу жуда катта шартнома эди. Мен машина сотиб олиш учун шартнома имзолаган санадан 3 кун аввал қайлиғим билан ажрашгандим. Ёдимда, мен дилерлик марказида йиғлаб юборган эдим, — деб эслади Лопес.

Жорж Клуни

Голливуд актёри Жорж Клуни карьерасининг бошида ижара квартирада дўсти ва унинг бувиси билан яшарди. Меҳмондўстликлари учун уларга миннатдорлик билдириш мақсадида Клуни биринчи маошини қария учун янги телевизор сотиб олишга сарфлаган.

Мен унга масофадан бошқариш пульти бор телевизор сотиб олдим, чунки у доим туришга ва канални алмаштиришга қийналар эди, — деди актёр интервьюда.

Селена Гомес

Хонанда ва актриса Селена Гомес Лос-Анжелесга кўчиб ўтганида дастлаб оиласи билан ижарада яшаган. Шу сабабли илк гонорарини Селена фақат ижара ҳақини тўлашга сарфлайди ва ўзини хурсанд қилиш учун янги пойабзал сотиб олади. Гомес кейинги, каттароқ маошини Louis Vuitton ноутбук сумкасига сарфлаганини айтди.

Дэниэл Редклифф

Актёр Дэниэл ўзининг илк йирик гонорарини болалигида — Гарри Поттерни суратга олишни бошлаганида олди. Актёр ҳаётда жуда тежамкор инсон бўлганлиги учун йирик гонорарни банк ҳисобига ўтказди.

Мен шу вақтга қадар бирор катта харидни амалга оширмаганман. Ҳисобимда доимо пул туриши менга эркинлик беради. Шу туфайли роль учун ўзим истаган фильмларни қўрқмай танлайвераман.

Эмма Уотсон

Гарри Поттернинг яна бир юлдузи ҳам пулларидан оқилона фойдаланади. Эмма Уотсон биринчи гонорарини фойдали нарса — ноутбук сотиб олишга ва отасини Тосканадаги таътилига сарфлаган. Актриса кейинги гонорарига Prius машинасини сотиб олган.

Мен ҳайдовчилик гувоҳномаси ва Prius машинасини сотиб олдим. Бу машинани чиройи эмас, балки у атроф-муҳитга камроқ зарар етказгани учун танладим. Машинам ҳам мен каби ақлли ва зерикарли, — дея ҳазиллашди Уоцон.