Ливанда барча партиялардан мустақил бўлган, умуммиллий ваколатларга эга ҳукумат тузилади, деб ёзмоқда Anadolu.
Бу ҳақда Ливанда ҳукумат тузиш ваколатига эга бўлган Салам Наваф президент Жозеф Аун билан учрашув якунларига бағишланган матбуот анжуманида маълум қилди. Салам “ҳукуматни шакллантириш вазифаси топширилгандан сўнг қабул қилган қарорларидан воз кечмаслигини” таъкидлади. Сиёсатчи, шунингдек, мавжуд қийинчиликларга қарамай, Ливанда ҳукумат яқин кунларда шакллантирилишини айтди.
Салам Ливан ҳукумати шакллантирилиши билан араб дунёси ва халқаро ҳамжамият томонидан қўллаб-қувватланиши таъминланишига эътибор қаратди.
Ҳеч бир вазирлик бирор гуруҳга тегишли эмас, деди у.
Унинг қўшимча қилишича, вазирлар депутатлардан ажратилади, маҳаллий ва парламент сайловларидаги номзодлар ҳукумат ишларида иштирок этмайди ҳамда барча партиялардан мустақил бўлган умуммиллий ваколатларга эга ҳукумат тузилади.
Ливанда 12 маротаба муваффақиятсиз сайловлардан сўнг президент тайинланди
Ливанда жорий йилнинг 9 январь куни икки йилдан ортиқ ҳокимият бўшлиғи ва сиёсий инқироздан сўнг президент сайланган эди. Ливан қуролли кучлари бош қўмондони Жозеф Аун парламентдаги овоз беришнинг иккинчи босқичи натижаларига кўра мамлакатнинг 14-президенти бўлган.
2022 йил октябрь ойида Ливаннинг собиқ президенти Мишел Ауннинг ваколати тугаганидан сўнг мамлакатдаги президентлик лавозими икки йилдан ортиқ вақт мобайнида бўш қолган эди. Бугунги кунгача Ливаннинг янги президентини сайлашга 12 марта муваффақиятсиз уринишлар бўлиб ўтган.
Шунингдек, БМТ Халқаро суди раиси Наваф Салам Ливан бош вазири этиб тайинланди ва унга республиканинг янги ҳукуматини шакллантириш топширилди.
Ливаннинг “Ҳизбуллоҳ” ва “Амал” ҳаракатлари сўнгги тўрт ҳукуматдаги каби Молия вазирлигини бошқаришни ўз зиммаларига олишни талаб қилмоқда.
Изоҳ (0)