Республика ташқи ишлар вазири вазифасини бажарувчи Абдулла Бу Ҳабиб Исроил Вазирлар маҳкамаси йиғилиши натижаларини кутиш кераклигини таъкидлади.
Ливан ва Исроил ўртасидаги ўт очишни тўхтатиш ҳақидаги келишув 27 ноябрга ўтар кечаси кучга кириши мумкин. Бу ҳақда республика ташқи ишлар вазири вазифасини бажарувчи Абдулла Бу Ҳабиб маълум қилди.
“Биз Исроил Вазирлар маҳкамаси йиғилиши натижаларини кутмоқдамиз. Ҳарбий ҳаракатлар ярим тунда тўхтатилиши керак. Биз сулҳга эриша оламиз, деб умид қиламиз”, деди Абдулла Бу Ҳабиб Elnashra ахборот порталига берган интервьюсида.
Аввалроқ Al Jadeed телеканали 27 ноябрь, чоршанба куни Ливан бош вазири Нажиб Микати томонидан ўт очишни тўхтатиш эълон қилиниши мумкинлиги ҳақида хабар берган эди. Ҳукумат раҳбарининг ўзи бу маълумотни тасдиқлашдан бош тортди ва “музокаралар давом этаётган пайтда изоҳ беришдан тийилишни афзал кўришини” таъкидлади.
Ливан ва Исроил АҚШ воситачилигида 60 кунлик ўтиш даврини кўзда тутувчи ўт очишни тўхтатиш келишуви лойиҳасини муҳокама қилмоқда, бунда Исроил ҳарбийлари Ливан жанубидан чиқиб кетади ва Ливан армияси чегара ҳудудларига жойлаштирилади. “Ҳизбуллоҳ”га келсак, у ўз қўшинлари ва оғир қуролларини Литани дарёсидан шимолга, чегарадан 30 км узоқликда олиб бориши керак бўлади.
Абдулла Бу Ҳабиб хабар беришича, келишув доирасида Ливан ҳукумати жанубий чегарага 5 минг аскар юборади, улар БМТнинг Ливандаги Муваққат кучлари (UNIFIL) томонидан қўллаб-қувватланади.
Изоҳ (0)