Ливанда минглаб намойишчилар Саад Ҳаририй коалицияси ҳукуматининг солиқ сиёсатига қарши норозилик билдирмоқда. Халқнинг норозилигига ҳукуматнинг WhatsApp мессенжеридан фойдаланганлик учун солиқ жорий қилиши ва тўлов миқдорини ойига 6 АҚШ доллари қилиб белгилангани сабаб бўлган. Намойишлар вақтида Телекоммуникациялар вазири Муҳаммад Шукур ушбу қарорнинг бекор қилинганлигини билдирган. Бу ҳақда «ТАСС» хабар берди.
Ҳукумат саройи ва парламент биноси яқинидаги Риёд Солиҳ майдонида ўтган норозиликларда одамлар: «Халқ ҳукумат алмашишини истамоқда!», — дея бақирган. Намойишчилар ҳамда ҳуқуқ-тартибот идоралари ходимлари билан тўқнашувлар ҳам содир бўлган.
17 октябрь, пайшанба куни бошланган норозилик ҳаракатлари иштирокчилари шаҳар ва унинг атрофидаги ҳудудларда — кўчаларга, автострадаларга ёнаётган шиналарни улоқтирган. Байрутни мамлакатнинг жанубий ҳамда шимолий ҳудудлар билан боғловчи йўллари ёпилган, шунингдек, тоғ довони йўналишидаги Дамашқ трассаси ҳам эгалланган. Намойишчилар автомобиль қатнови қисмига ўз чодирларини жойлаштириб олган.
18 октябрда Ливан хавфсизлик кучлари намойишчиларнинг ҳаракатларига қаршилик кўрсатиб кўзни ёшлантирувчи газ қўллаб уларни тарқатишга уринган. Маълумотларга кўра, ушбу ҳаракат таъсирида намойишчиларнинг бир нечтаси ҳушини йўқотган.
Намойишлар сабаб юз берган ёнғинлар натижасида хорижлик икки нафар ишчи ҳалок бўлган. Ёнғинни ўчириш ва талафот кўрганларни қутқариш ишларини қутқарувчилар амалга оширмоқда.
Ҳозирча ёнғиннинг қай тариқа юз бергани ва қурбонларнинг қайси давлат фуқаролари эканлиги ойдинлаштирилмаган.
«Намойишчилар ҳамда ҳуқуқ-тартибот идоралари ходимлари ўртасидаги тўқнашувлар натижасида 70 нафар одам талафот кўрган ва уларга жойида тиббий ёрдам кўрсатилган. 23 нафар норозилик иштирокчиси шифохонага олиб кетилган», — дейилади Қизил Хоч ташкилотининг Ливандаги вакилларининг баёнотида.
Мамлакатдаги Прогрессив-социал партия раиси Валид Жумблат Байрут ва бошқа ҳудудлардаги норозиликларни «халқнинг исёни» дея таърифлади. Парламент депутати Ҳусайн Ҳожи Ҳасан эса ҳукуматдан солиқ сиёсатини ўзгартириш ва давлат бюджетини тўлдириш масалаларини халқнинг пастки қатламига зарар етказмасдан амалга оширишни таклиф этди.
Ливан ички ишлар вазири Рая ал-Ҳасан маҳаллий телеканалларга берган интервьюсида мамлакатдаги вазият ҳукумат назорати остида экани ва бош вазир истеъфога чиқмаслигини маълум қилган.
«Айрим жойлардаги тартибсизликларга қарамай намойишлар тинчлик билан ўтмоқда», — дея қайд этган вазир.
Ливан бош вазири Саад Ҳаририй вазирлар ҳукумат саройигача йўллардаги намойишлар сабаб етиб кела олмагани туфайли Вазирлар маҳкамасининг Байрутдаги йиғилишини бекор қилган.
Сентябрда мамлакат бош вазири «миллий иқтисодиётда фавқулодда ҳолат» эълон қилди ва вазирлар маҳкамасининг давлат бюджети дефицитини 2020-молиявий йилда 7 фоизга туширишга қарор қилганлигини билдирди. Июлда Ливан парламенти 2019-молиявий йил учун давлат бюджети лойиҳасини Жаҳон банки тавсиясига кўра 11 фоиздан 7,5 фоизга тушган дефицит билан тасдиқлаганди. Ҳаририй ҳукумати давлат сектори ва ҳарбийларнинг ижтимоий тўловлари ва пенсияларини қисқартириб дефолтдан қочишга уринди. 2018 йилда ўтган Париж-4 халқаро конференциясида («Қадр») донор-давлатлар Ливанга иқтисодиётини барқарорлаштириши ва катта инфратузилма лойиҳаларини амалга ошириши учун 11 миллиарддан кўпроқ тўлов субсидияларисиз имтиёзли кредитлар ажратишни ваъда берган.
Изоҳ (0)