Австрия пойтахти Вена шаҳрида 31 январь, якшанба куни ҳукуматнинг коронавирусга қарши чораларига норозилик билдириш учун 5000 га яқин одам кўчаларга чиқди, дея хабар бермоқда «Korrespondent.net».
Аввал бўлиб ўтган карантинга қарши намойиш иштирокчиларининг аксарияти атай ниқоб киймагани ва ижтимоий масофани сақламагани учун полиция томонидан ҳафта охирида ўтказиладиган ҳар қандай оммавий тадбирларга тақиқ қўйилганди. Митинг иштирокчилари ушбу тақиқларга аҳамият бермади.
Бу сафар ҳам аксарият намойишчилар санитария қоидаларига риоя қилишдан бош тортди. Маълум қилинишича, кўчага чиққан фуқаролар орасида неонацистлар ҳаракати тарафдорлари ва қасддан тартибсизликлар уюштирган кишилар бўлган. Тарқалишдан бош тортган жамоат Австрия парламенти томон йўл олгач, полиция уларни ҳибсга олишни бошлади.
30 январь, шанба куни ўнг қанот Австрия Озодлик партияси оммавий тадбирларнинг тақиқланишига қарши норозилик намойиши ўтказиш ҳуқуқидан маҳрум бўлганди. Шундан сўнг партия Вена аҳолисини 31 январь куни намойиш ўтказишга чақирди. Полиция ўзининг акция ўтказишни тақиқлашга оид қарорини коронавирус тарқалиши хавфи туфайли, дея изоҳлади.
Австрияда коронавирус пандемияси
Австрияда коронавирусга қарши қатъий карантин чоралари ташкил этилган. Мамлакатда мактаблар, спорт заллари, маданият муассасалари, шунингдек, кўпгина дўконлар ёпиқ. Мазкур чораларга қарамай, 31 январь куни Соғлиқни сақлаш вазирлиги ўтган бир кеча-кундузда SARS-CoV-2 вирусини юқтириш бўйича 1190 та янги ҳолат ҳақида хабар берди.
Брюсселда карантинга қарши намойиш ҳибсга олиш билан якунланди
Бельгия пойтахти Брюссель марказида карантин чораларига қарши намойишга чиққанларнинг 300 нафари полиция томонидан ҳибсга олинди. Полиция Брюссель марказий темир йўл вокзали ва Мон-де-Арт атрофидаги намойишларни тарқатиб юборди.
28 январь, пайшанба куни ҳукумат оммавий тўпланиш коронавирус тарқалишини тезлаштириши мумкин деган хавотирда митинг ўтказилишига рухсат бермаганди. Якшанба куни полиция йиғилмаслик ҳақидаги чақириғини такрорлади.
Бельгия ҳукумати инфекциянинг янги тўлқини авж олишига йўл қўймаслик мақсадида 1 мартга қадар ватанга қайтиш заруратидан ташқари мамлакатга уюштириладиган барча саёҳатларни тақиқлади. Бундан ташқари мамлакатда комендантлик соати, уйдан туриб ишлаш, ресторан ва барларнинг ёпилиши сингари чекловлар ўрнатилган. Бельгиянинг баъзи шаҳарлар ва муниципалитетларида қатъий қоидалар ўрнатилган.
Эслатиб ўтамиз, Нидерландияда карантинга қарши намойишлар Роттердам, Хертогенбос, Амстердам, Гаага, Зволле, Тилбург, Хелена шаҳарларида бўлиб ўтди. Амстердамдаги тартибсизлик пайтида портлашлар юз берган.
24 январь куни Нидерланияда карантин мухолифлари COVID-19 тест марказини ёқиб юборган. Намойишчиларни тарқатиш учун полиция кучлари сув замбараклари, отлар, итлар ва дубинкалардан фойдаланишга мажбур бўлди. Эйндховенда полиция кўзни ёшлантирувчи газдан фойдаланган.
Аввалроқ Ливан шимолида жойлашган Триполи шаҳрида локдаунга қарши намойишчиларнинг ҳуқуқ-тартибот органлари ходимлари билан тўқнашуви содир бўлганди. Беш нафар намойишчи ва уч нафар ички хавфсизлик ходими жароҳат олиб, ўнлаб одамлар ҳибсга олинган.
Изоҳ (0)