Наманган, Самарқанд, Фарғона ва Сурхондарё вилоятларида табиий газ ва электр энергиясидан ноқонуний фойдаланиш ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Янги Наманган туманида фуқаролар М.Х. ва Д.А. “Бунёдкор” МФЙ ҳудудидаги савдо дўконида электр тармоғига тижорат мақсадида ўзбошимчалик билан уланиб, 245,6 млн сўмлик электр энергиясидан ноқонуний фойдаланган.
Шунингдек, Тойлоқ туманида “Қ.А.” МЧЖ раҳбари Б.Ш. “Адас” МФЙ ҳудудидаги ғишт ишлаб чиқариш цехида ўзбошимчалик билан газ тармоғига тўғридан тўғри уланиб, 186,1 млн сўмлик табиий газдан ноқонуний фойдаланган.
Шу билан бирга, Олтиариқ туманида “С.О.” фермер хўжалиги раҳбари С.О. сув насосларини электр энергиясига ўзбошимчалик билан улаб, 141,4 млн сўмлик электр энергиясидан ноқонуний фойдаланган.
Бундан ташқари, Узун туманида “Й.А.” МЧЖ бошқарувчиси Х.Я. “Янги ҳаёт” МФЙ ҳудудидаги умумий овқатланиш шохобчасида ўрнатилган электр ҳисоблагичга ташқи таъсир ўтказиб, 101,9 млн сўмлик электр энергиясидан ноқонуний фойдаланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)