Andijon viloyatida tabiiy gazdan, Toshkent shahrida elektr energiyasidan noqonuniy foydalanish holati aniqlandi. Bu haqda Bosh prokuratura matbuot xizmati xabar berdi.
Maʼlum qilinishicha, Andijon viloyati Xo‘jaobod tumanidagi “B.B.B” MCHJ rahbari A.S. jamiyatga qarashli binoda tashkil qilingan ohak sexiga o‘rnatilgan elektron hisoblagichning tamg‘asini buzgan.
Dastlabki hisob-kitoblarga ko‘ra, 5,3 mlrd so‘mlik tabiiy gazdan noqonuniy foydalangan.
Holat bo‘yicha tergovga qadar tekshiruv harakatlari olib borilmoqda.
Shuningdek, Toshkent shahrining Mirzo Ulug‘bek tumanidagi “S.T.” MCHJ mansabdor shaxslari va boshqalar jamiyatga qarashli konteynerga 40 dona mayning qurilmalarini o‘rnatib, qonunga zid ravishda mayning faoliyati bilan shug‘ullanib kelgan.
Oqibatda 2,1 mlrd so‘mlik elektr energiyasidan noqonuniy foydalanilgan.
Holatlar yuzasidan jamiyat mansabdor shaxslari va boshqalarga nisbatan jinoyat ishi qo‘zg‘atilgan.
Gazni o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalanilgan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Izoh (0)