Жиззах вилоятининг Янгиобод, Тошкент вилоятининг Зангиота, Қорақалпоғистон Республикасининг Беруний ва Тошкент шаҳрининг Учтепа туманида энергия ресурсларидан ноқонуний фойдаланиш ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, “А.С.” МЧЖ масъул шахслари Янгиобод тумани, Мустақиллик кўчасидаги умумий овқатланиш шохобчасида газ тармоғига газ ҳисоблагичдан ташқари уланган. Натижада жами 192,2 млн сўмлик табиий газдан ноқонуний фойдаланилган.
Шунингдек, Зангиота туманида фуқаролар М.О. ва М.Х. яшаш хонадонларида паст босимли умумий фойдаланишдаги газ қувурига яширинча шланг ёрдамида уланган. Оқибатда жами 151,7 сўмлик табиий ресурслардан ноқонуний фойдаланилган.
Шу билан бирга, Беруний туманида фуқаро Ю.Н. яшаш хонадонида газ тармоғига шланг ёрдамида тўғридан-тўғри уланиб, жами 126,6 млн сўмлик табиий газдан ноқонуний фойдаланган.
Бундан ташқари, Учтепа туманида фуқаро Р.Н. ўзига тегишли турар жой биносида умумий фойдаланишдаги электр тармоғига тижорат мақсадида тўғридан-тўғри уланган. Сўнг жами 111,5 млн сўмлик электр энергиясидан ноқонуний фойдаланган.
Мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Энергия ресурсларидан ноқонуний фойдаланиш ҳолатлари ортиб бормоқда
Ўзбекистоннинг турли ҳудудларида энергия ресурсларидан ноқонуний фойдаланиш ҳолатлари аниқланмоқда. Ушбу ҳолатларнинг аксариятида миқдор млрд сўмдан ортиқ. Хусусан, Сирдарёда 683 млн сўмлик “свет”дан ноқонуний фойдаланган шахс ушланган эди.
Шунингдек, Сирдарёдаги маиший хизмат кўрсатиш шохобчасида 325 млн сўмлик “свет”дан ноқонуний фойдаланилгани аниқланганди. Шу билан бирга, Қорақалпоғистон Республикаси ва Тошкентда жами 2 млрд сўмлик “свет”дан ноқонуний фойдаланилгани ҳақида хабар берилган эди.
Бундан ташқари, Ангрендаги метан заправкада 1,1 млрд сўмлик электр энергиясидан ноқонуний фойдаланилгани аниқланган.
Изоҳ (0)