Европа иттифоқи мамлакатлари ташқи ишлар вазирлари Брюсселдаги йиғилишда Сурияга қарши сўнгги бир неча йил давомида амалда бўлган санкцияларни босқичма-босқич юмшатиш режасини келишиб олди.
Германия, Франция, Испания, Нидерландия, Дания, Финляндия Сурияда ҳокимият алмашиши муносабати билан чекловларни қисман олиб ташлаш тарафдори бўлдилар.
Европа иттифоқи дипломатлари блокнинг Сурияга нисбатан санкцияларини юмшатиш бўйича йўл харитасини келишиб олдилар, деб ёзди Европа дипломатияси раҳбари Кая Каллас Х ижтимоий тармоғида.
Euronewsънинг ёзишича, Европа Иттифоқи ТИВ раҳбарларининг учрашувидан олдин Еврокенгаш Сурия бўйича музокаралар учун ҳужжат тайёрлаган, унда фуқаролик парвозларини соддалаштириш учун авиакомпаниялар, жумладан, Syrian Араб Airlines’га нисбатан санкцияларни олиб ташлаш, шунингдек, нефть-газ технологияларини экспорт қилиш тақиқини қайта кўриб чиқиш таклиф этилган.
Шу билан бирга, Башар Асад ва унинг тарафдорларига қарши санкциялар ўз кучида қолади. Ҳокимият тепасига келган “Ҳайъат Таҳрир аш-Шом”ни террорчи ташкилотлар рўйхатидан чиқариш масаласи БМТ Хавфсизлик кенгаши даражасида ҳал қилиниши кутилмоқда.
Европа иттифоқи Сурия ҳукумати ва ҳарбий тузилмаларига қаратилган иқтисодий санкцияларни 2012 йилда жорий этган. Чекловлар нефть эмбаргоси, баъзи инвестицияларни чеклаш, Сурия Марказий банкининг Евроиттифоқдаги активларини музлатиш ва қатағон учун ишлатилиши мумкин бўлган асбоб-ускуналар ва технологияларга экспорт чекловларни ўз ичига олган.
Европа иттифоқи аввалроқ Дамашқдан Европа санкцияларини олиб ташлаш ва мамлакатдаги можарони ҳал қилиш учун хориж кучлари, шу жумладан Россиянинг
ҳарбий базаларидан халос бўлишни сўраган эди.
Ҳа, албатта, бу биз кузатаётган масала. Биз янги ҳукуматга Суриядаги нормаллаштиришнинг бир қисми ҳар қандай хорижий иштирокдан — ҳарбий иштирок ёки аралашувдан халос бўлишни ўз ичига олиши кераклигини маълум қилдик. У ерда учта давлат бор, улардан бири — Россия, деди Европа иттифоқи вакили журналистларга.
Изоҳ (0)