Россиянинг самолётлари Суриядаги исёнчиларга ҳужум қилиш ўрнига бўш саҳрони бомбардимон қилган. Эроннинг юқори мартабали генерали Россияни Теҳронга ёлғон гапирганликда айблади. Бу ҳақда Business Insider хабар берди.
Генерал майор Беҳруз Эсбатий Теҳрондаги масжидда сўзлаган нутқида Башар Асад ҳукуматининг қулашида Москвани қисман айблади.
“Биз мағлубиятга учрадик ва бу жуда оғир. Биз жуда катта зарба олдик ва бу қийин аҳволга солиб қўйди”, деди Эсбати Асаднинг қулаши ҳақида.
Генералга кўра, Россия Асадни қувиб чиқаришда бошчилик қилган исёнчи гуруҳ — “Ҳайъат Таҳрир ал-Шом” штаб-квартирасига бомба ёғдираётгани ҳақида Эронни хабардор қилган.
“Аммо Москва қўшинлари бунинг ўрнига саҳроларни нишонга олган”, деди Эсбати.
Бундан ташқари, генералнинг таъкидлашича, 2024 йили Исроил Суриядаги Эрон билан боғлиқ объектларга зарба берганида, Россия баъзи радарларни ўчириб қўйган ва “аслида бу ҳужумларни қўллаб-қувватлаган”.
Генерал Асаднинг ағдарилишида асосан ички коррупцияни айблаб, Суриянинг юқори мартабали амалдорлари ва генераллари орасида порахўрлик кенг тарқалганини айтди.
У Дамашқ ва Теҳрон ўртасидаги муносабатлар сўнгги бир йил ичида кескинлашганини таъкидлади. Бунга Асад Эроннинг Сурия орқали Исроилга ҳужумлар бериш илтимосини рад этгани сабаб бўлган.
Эсбати Сурияда Эроннинг ҳарбий операцияларига раҳбарлик қилган ва ўз ҳаракатларини Сурия ҳарбий бошлиқлари ва Россия генераллари билан мувофиқлаштирган. Россия ҳукумати Эсбатининг айбловларига ҳозирча изоҳ бермади.
Изоҳ (0)