Комикс асосида суратга олинган “Темир одам” фильми — бутунлай хаёлот маҳсули. Аммо бу тасаввурий олам ва реал ҳаёт ўртасидаги ўхшашликни излаганда биринчи навбатда Темир одамнинг уйи хаёлга келади.
Пенгилли-ҳаус Тони Stark фильмларида тасвирланган уйга шунчалик ўхшайдики, у ҳозир расман Темир одам уйи деб аталади. Уни Кейптаундаги энг машҳур уй деса ҳам бўлади. 20 миллион долларга баҳоланган виллани қисқа муддатга ижарага олиб, яхшироқ ўрганиб чиқиш мумкин.
Темир одам уйи автомобиль галереяси ва меъморий санъат асари ҳисобланувчи 12 та машинали гаражи туфайли коллексионерлар орзусига айланган. Бундай ажойиб гаражда учратиш мумкин бўлган 12 та темир тойчоқни сотиб олиш у ёқда турсин, бу жойни бир кечага ижарага олиш учун 20 минг доллардан ортиқ маблағ сарфлашга ҳамманинг ҳам қурби етавермайди.
Уй архитектор Пеерутин Карол томонидан ишлаб чиқилган ва беш йиллик қурилишдан сўнг 2015 йилда битказилган. Карол ўз ишида Лос Анжелеснинг Ўрта асрлардаги модернистик архитектурасига, хусусан, Жон Лотнер ишига ҳурмат кўрсатган. Лотнер бетон, шиша ва пўлатдан яратган конструкциялар мустаҳкам утилитар ташқи дизайнига қарамай, ичкарида табиат гўзаллигини акс эттиради.
Темир одам уйи — шундоққина Атлантика океани рўпарасидаги тоғ тизмаси этагида жойлашган тўрт қаватли бетон вилладир. У олтита ётоқхона, ўнта ҳаммом, учта бассейн, ички боғ, уй кинотеатри, учта ошхона, океан манзарали катта орқа ҳовли ва, энг муҳими, ажойиб гаражга эга.
Гараж биринчи қаватда, асосий кириш эшиги яқинида жойлашган. Унга тош ётқизилган ёпиқ йўлак орқали кирилади. Бу ерда уй эгасининг 12 та энг ҳашаматли автомобили сақланади, ташқарида қўшимча автомобиль майдончаси ҳам бор. Гаражда бир нечта люклар мавжуд бўлиб, улар табиий ёруғликни таъминлаб беради.
Гаражнинг диққатга сазовор жойи бу — бир томондан иккинчи томонга олиб ўтувчи ёпиқ шиша кўприкдир. У уйнинг иккинчи қаватидаги иккита қанотни бирлаштиради ва гараж коллекцияларни намойиш қилиш мумкин бўлган галереяга айланади. Пол ва деворларнинг ҳаммаси шишадан, аммо уни яна ҳам жозибадор қиладиган жиҳати — кўприк томи ойнали эканлигида.
Изоҳ (0)