Юлдузларнинг шахсий ҳаёти ҳақида янгиликлардан ёки ижтимоий тармоқлардаги шахсий блогларидан эшитамиз. Аммо севимли актёр, қўшиқчи ва бошқа жамоат арбобларимиз папарацци камералари назарида бўлмаганда қандай яшашини кўриш кўпчиликка қизиқ.
Жорж Клунининг самбитгул (олеандр)ли вилласи
Олеандрли вилла — таниқли актёр ва режиссёр Жорж Клунига тегишли бўлган ҳашаматли мулк бўлиб, Италиянинг гўзал Комо кўли бўйида жойлашган. Унинг нархи 100 миллион еврога баҳоланмоқда. Бу вилла ҳашамат ва нафосат тимсолларидан бири бўлиб, у актёр мухлислари ва мураккаб услубни хуш кўрувчилар орасида машҳурдир.
Сўнгги икки аср давомида вилла кўплаб бадавлат оилаларга тегишли бўлган. Клуни ҳам уйни Ҳайнц оиласидан сотиб олган. Мулкнинг архитектураси — Ўрта Ер денгизи элементлари қўшилган ҳолда италян неоклассик услубида қурилган бино. Кўл ва гўзал боғга қараган балконлар ўзига хос қулай муҳитни яратади.
Вилла дарахтга ўхшаш самбитгуллар ўсадиган гўзал боғлар билан ўралган. Гулзорлар, ям-яшил майдонлар, кўлга қараган бассейн, шинам айвонлар ва жиҳозланган дам олиш жойлари машҳур кўлнинг мафтункор табиатидан баҳраманд бўлиш имконини беради.
Уйнинг интерьери ҳам ҳашамати билан ажралиб туради — 25 та хонанинг ички қисми Венеция гипси, антиқа мебеллар ва санъат асарлари билан безатилган. Очиқ осмон остидаги театр, сузиш ҳавзаси, спорт зали, кенг гараж ва питцерия ўзига хос фаровонлик муҳитини яратади.
Кўплаб машҳур одамлар сингари Клуни ҳам эътиборни жалб қилмасдан дам олишни афзал кўради. 2015 йилда шаҳар мэри мухлислар ва оммавий ахборот воситаларининг Клуни уйига яқинлашишини тақиқловчи фармон чиқарган — унга кўра Самбитгулли вилладан 90 метр узоқда юришингиз керак, йўқса 500 еврогача жаримага тортилишингиз мумкин.
Том Крузнинг Колорадодаги мулки
Том Крузнинг Колорадодаги 39,5 миллион долларлик собиқ мулки ҳашаматнинг бутунлай тескарисидир. Бу ерда ўзгача гўзаллик бор – бир томондан қалин ўрмонлар билан ўралган тоғ тизмалари, иккинчи томондан водийнинг ажойиб манзараси.
Асосий хона ва меҳмонхонанинг ўзи 1000 квадрат метрдан ортиқ майдонга эга. Ҳамма нарса арча ва табиий тошдан қурилган бўлиб, у бинони атрофдаги ландшафтга уйғунлаштиради ва табиат билан бирликни таъминлайди. Асосий уйдаги тўртта ва меҳмонхонадаги учта ётоқхона минималист услубда яратилган.
Катта деразалари бўлган меҳмонхона ҳайратланарли манзараларни тақдим этади. Катта камин айниқса қиш ойларида атрофдаги табиат ухлаб ётганда жоннинг роҳати. Меҳмонхона майдони ошхона ва овқатланиш хонаси билан бирлаштирилган бўлиб, бу ер оила ёки дўстлар билан дам олиш учун жуда қулайдир. Шахсий учрашувлар учун иккинчи меҳмонхона мавжуд, у китоблар тўпламига бой бўлган кутубхонадир.
Ҳеч бир хонада телевизор йўқ. Бунинг ўрнига, машғулот хонасида бильярд столи, пианино ва футбол столи мавжуд. 130 гектарли ҳовлида спорт зали, пиёда юриш ва сайр қилиш имкониятлари мавжуд. Ёз ойларида очиқ теннис ва велоспортдан баҳраманд бўлиш мумкин, қишда эса хоккей ва “снегоход”дан маза қилиш мумкин.
Бу ранчо шаҳар шовқинидан, безовта қилувчи оломондан узоқроқда ҳордиқ чиқариш имконини беради. Бу ерда табиат билан уйғунликда хотиржамликни топиш мумкин.
Кайли Женнернинг Лос-Анжелесдаги уйи
Кайлининг уйи 36,5 миллион долларга баҳоланган, ҳақиқий юқори технологияли турар жойнинг намунаси бўла олади. Бу ерда ҳамма нарса ажойиб — 1800 квадрат метр майдондан бошланган ҳашаматли экстерьер, ноёб дарахтлар, катта сузиш ҳавзаси ва технологик мўжизалар билан тугайди. Еттита ётоқхона, иккита уй кинотеатри, битта очиқ кинотеатр, баскетбол майдони, теннис корти ва тўртта меҳмонхона Женнер хонимнинг катта оиласи учун айни муддао.
Уй тўлиқ замонавий услубда жиҳозланган. Хоналар машҳур дизайнерларнинг кўплаб ишлари, жумладан, буюртма асосида тайёрланган мебель ва декорлар билан безатилган. Техник нуқтаи назардан, ҳамма нарса энг сўнгги замонавий технологиялар, жумладан, “ақлли уй” тизимига мувофиқ ташкил этилган.
Катта майдони, шу жумладан 465 квадрат метрни эгаллаган ҳовли туфайли сарой Голливуд юлдузлари учун турли тадбирлар ва кечаларда ҳақиқий марказга айланади.
Мулк Лос-Анжелеснинг нуфузли ҳудудида жойлашганлигини ҳисобга олиб, хавфсизлик масалаларига катта эътибор берилади. Махфийликни ҳимоя қилиш соҳасидаги барча сўнгги ечимлар аҳоли ва меҳмонларга хотиржамликни таъминлаш учун қўлланилади.
Изоҳ (0)