Komiks asosida suratga olingan “Temir odam” filmi — butunlay xayolot mahsuli. Ammo bu tasavvuriy olam va real hayot o‘rtasidagi o‘xshashlikni izlaganda birinchi navbatda Temir odamning uyi xayolga keladi.
Pengilli-haus Toni Stark filmlarida tasvirlangan uyga shunchalik o‘xshaydiki, u hozir rasman Temir odam uyi deb ataladi. Uni Keyptaundagi eng mashhur uy desa ham bo‘ladi. 20 million dollarga baholangan villani qisqa muddatga ijaraga olib, yaxshiroq o‘rganib chiqish mumkin.
Temir odam uyi avtomobil galereyasi va meʼmoriy sanʼat asari hisoblanuvchi 12 ta mashinali garaji tufayli kolleksionerlar orzusiga aylangan. Bunday ajoyib garajda uchratish mumkin bo‘lgan 12 ta temir toychoqni sotib olish u yoqda tursin, bu joyni bir kechaga ijaraga olish uchun 20 ming dollardan ortiq mablag‘ sarflashga hammaning ham qurbi yetavermaydi.
Uy arxitektor Peerutin Karol tomonidan ishlab chiqilgan va besh yillik qurilishdan so‘ng 2015-yilda bitkazilgan. Karol o‘z ishida Los Anjelesning O‘rta asrlardagi modernistik arxitekturasiga, xususan, Jon Lotner ishiga hurmat ko‘rsatgan. Lotner beton, shisha va po‘latdan yaratgan konstruksiyalar mustahkam utilitar tashqi dizayniga qaramay, ichkarida tabiat go‘zalligini aks ettiradi.
Temir odam uyi — shundoqqina Atlantika okeani ro‘parasidagi tog‘ tizmasi etagida joylashgan to‘rt qavatli beton villadir. U oltita yotoqxona, o‘nta hammom, uchta basseyn, ichki bog‘, uy kinoteatri, uchta oshxona, okean manzarali katta orqa hovli va, eng muhimi, ajoyib garajga ega.
Garaj birinchi qavatda, asosiy kirish eshigi yaqinida joylashgan. Unga tosh yotqizilgan yopiq yo‘lak orqali kiriladi. Bu yerda uy egasining 12 ta eng hashamatli avtomobili saqlanadi, tashqarida qo‘shimcha avtomobil maydonchasi ham bor. Garajda bir nechta lyuklar mavjud bo‘lib, ular tabiiy yorug‘likni ta’minlab beradi.
Garajning diqqatga sazovor joyi bu — bir tomondan ikkinchi tomonga olib o‘tuvchi yopiq shisha ko‘prikdir. U uyning ikkinchi qavatidagi ikkita qanotni birlashtiradi va garaj kolleksiyalarni namoyish qilish mumkin bo‘lgan galereyaga aylanadi. Pol va devorlarning hammasi shishadan, ammo uni yana ham jozibador qiladigan jihati — ko‘prik tomi oynali ekanligida.
Izoh (0)