АҚШ стратегик бомбардимончи самолёти 5 июнь куни Жанубий Кореяда ўтказилаётган ҳарбий машғулотларга қўшилган. Бу ҳақда Корея яримороли манбаларига асосланиб, Reuters хабар берди.
Манбада айтилишича, АҚШнинг B-1 стратегик бомбардимончи самолёти чоршанба кунги ўқув миссияси давомида Жанубий Корея қирувчи самолётлари билан биргаликдаги парвозни амалга оширган. Самолётлар шартли душман бункерларини йўқ қилиш операцияларини бажарган.
Ҳарбий операция давомида стратегик бомбардимончи тегишли нуқталарга JDAM типидаги снарядлар улоқтирган. Бу маълумотни Жанубий Корея Мудофаа вазирлиги ҳам тасдиқлаган. Вазирлик, шунингдек, ушбу турдаги қурол Корея яриморолида сўнгги бор 7 йил олдин ишлатилганини қўшимча қилган.
Олдинроқ Жанубий Корея ҳукумати шимолликлар билан кескинликни юмшатиш ва ҳарбий тўқнашувларнинг олдини олишга қаратилган 2018 йилги ҳарбий келишувни тўхтатганини маълум қилган эди. Шу воқеадан кейин Шимолий Корея билан чегарадош демилитаризация зонаси яқинига қўшимча ҳарбий кучлар жойлаштирилиши билдирилган.
АҚШ стратегик бомбардимончи самолёти ҳам ушбу кескинлик кучайиши фонида Сеулга жўнатилган. У фавқулодда вазиятда душман нуқталарини ўта аниқликда ура оладиган тизим билан жиҳозланган.
Ҳарбий машқларда B-1 бомбардимончиси бирга Жанубий Кореянинг F-15K қирувчи самолётлари, шунингдек, Stealth F-35 ва F-16 қирувчилари ҳам иштирок этган. Машғулот олиб борилган ҳудуд ҳақида маълумот тўлиқ тақдим қилинмаган.
Изоҳ (0)