Шимолий Кореянинг “Манригён-1” ҳарбий разведка сунъий йўлдоши Оқ уй ва Пентагоннинг суратларини, шунингдек, бир қанча ҳарбий базалар суратларини олди, деб хабар бермоқда Корея марказий ахборот агентлиги (KCNA).
Бундан ташқари, сунъий йўлдош Рим (фотосурат 25 ноябрда олинган), Гуам оролидаги Американинг Андерсен ҳаво кучлари базаси (27 ноябрда олинган), АҚШнинг Виржиния штатидаги аэродром ҳудуди, Норфолк денгиз базаси ва Newport News кемасозлик заводи (27 ноябрда олинган) тасвирларини ҳам тақдим этди.
“АҚШнинг Виржиния штатидаги Норфолк ҳарбий-денгиз станцияси ва Newport News кемасозлик заводи суратларида АҚШ ҳарбий-денгиз кучларининг тўртта ядровий самолёт ташувчиси ва битта Британия самолёт ташувчиси аниқланган”, — дейилади хабарда.
Фотосуратлар Шимолий Корея етакчиси Ким Чен Инга кўрсатилган.
Пентагон вакили “РИА Новости”га Оқ уй ва АҚШ Мудофаа вазирлигининг сунъий йўлдошдан олинган суратлари ҳақидаги хабарлар ҳақиқийлигини тасдиқлай олмаслигини айтди.
22 ноябрь куни KCNA Шимолий Корея “Чхоллима-1” ракетасини ҳарбий сунъий йўлдош билан муваффақиятли учиргани, у режалаштирилган орбитага киргани ҳақида хабар берди. Агентликнинг таъкидлашича, сунъий йўлдошнинг учирилиши КХДРнинг ҳарбий ҳаракатларга тайёрлигини оширади. 1 декабрдан бошлаб сунъий йўлдош тўлиқ разведка ҳаракатларини бошлаши керак. Бундан ташқари, Пхеньян коинотга Жанубий Корея ҳудудини кузата оладиган яна бир нечта разведка йўлдошларини юборишни режалаштирмоқда.
Изоҳ (0)