Озарбайжон президенти Илҳом Алиев Оқтовдаги авиаҳалокатда ҳалок бўлган экипаж аъзоларининг оила аъзолари ва омон қолган борт кузатувчилари билан учрашувда ушбу фожиа учун Россия Федерацияси вакиллари жавобгар эканини маълум қилди.
“Биз адолатни талаб қиламиз, айбдорларни жазолашни ва тўлиқ шаффофликни, инсоний муносабатни кутамиз”, деди Алиев.
Унинг сўзларига кўра, ҳозирда қора қутилар декодлаш жараёнида ва яқинда дастлабки натижалар маълум бўлади.
“Мен ишонч билан айта оламанки, ҳалокатда, Озарбайжон фуқаролари ўлимида айб Россия Федерацияси вакилларида. Яқин кунларда биз дастлабки натижани биламиз ва ҳамма нарса ўз ўрнига тушади, юз берган фожианинг тўлиқ манзараси ойдинлашади. Бу, албатта, ушбу фожиани тўлиқ тергов қилиш ва айбдорларни жазолаш ишида муҳим аҳамият касб этади”, деди Озарбайжон президенти.
Аввалроқ Бразилияда Оқтов яқинида ҳалокатга учраган самолётнинг қора қутиларини ўрганиш бошлангани хабар қилинган эди.
29 декабрь куни Россия президенти Владимир Путин Озарбайжонлик ҳамкасбидан авиаҳалокат “Россия ҳаво ҳудудида юз бергани учун” узр сўради. У қурбонларнинг оиласига ҳамдардлик, омон қолганларга тезроқ соғайиб кетишни тилади.
Қозоғистондаги авиаҳалокат
Бокудан Грознийга J28243 рейсини амалга ошираётган Embraer 190 самолёти 25 декабрь куни эрталаб Қозоғистоннинг Оқтов шаҳри яқинида ҳалокатга учради. Диспетчерлар Грозний ва Махачқалъада қўнишни рад этганидан кейин лайнер мажбурий қўнишни амалга оширишга уринди. Оқтов аэропортига бир неча километр қолганда у қулаб тушди, портлаб, ёниб кетди.
Бурун қисми тўлиқ ёнган, дум қисмида эса омон қолганлар бўлган. Камида 29 нафар тирик қолган йўловчи айнан шу қисмда бўлган. Улар касалхонага олиб кетилган. Azerbaijan Airlines самолёти қулаши оқибатида 38 киши ҳалок бўлган. Қулаган самолёт кўздан кечирилганда тешиклар аниқланган. Шунга асосланиб, айрим манбалар самолётни Чеченистонга дрон ҳужумини қайтарган ҳаво ҳужумидан мудофаа тизими ўққа тутган бўлиши мумкинлигини ёзган.
Изоҳ (0)