Беларусь президенти Александр Лукашенко мамлакатдаги диктатура “Украинадаги демократиядан кўра афзалроқ” эканини айтди. Бу ҳақда у Логойск шаҳрида Рождество ибодати чоғида маълум қилди.
Лукашенконинг баёноти у Украина президенти Владимир Зеленскийдан узр сўрагани ҳақидаги хабарлар фонида янгради. Зеленский аввалроқ Лукашенко урушнинг илк кунларида узр сўраганини эслатганди. Бунга Россия армияси Беларусь ҳудудидан ракета учиргани сабаб бўлган.
“Урушнинг биринчи кунларидан бир неча кун ўтиб, Лукашенко билан телефонда гаплашдим ва у кечирим сўради. Бу мен эмас, менинг ҳудудимдан ракеталар учирилди ва Путин учирди. Сен ишон, Володя, бу мен эмас. Мен назорат қилмайман, бу шунчаки ракеталар, бу Путин...”, дея Зеленский Лукашенконинг гапларини ёдга олган.
Украина етакчисига кўра, Лукашенко Гомел вилоятидаги энг йирик Мозир нефтни қайта ишлаш заводига жавоб зарбаси беришни таклиф қилган.
Беларусь Лукашенконинг узр сўраганини рад этмоқда
Лукашенко матбуот котиби Наталя Эйсмонт Украина президентидан кечирим сўралмаганини айтди.
“Оддий сабабга кўра, биз кечирим сўрашимиз шарт эмас. Авваламбор, Украина Беларусга қарши санкцияларни биринчи бўлиб жорий этгани, ҳатто Америка ва бутун Ғарбдан олдинда югуриб кетгани ёдимизда”, деган у.
Эйсмонтнинг сўзларига кўра, Зеленский ва Лукашенко ўртасидаги суҳбат ҳақиқатан ҳам бўлиб ўтган Беларусь раҳбари “биринчи навбатда можаро Украина ҳудудида, Зеленский ҳудудида содир бўлганини ва вақт ўтиши билан одамлар ўлими учун бошқалардан кўра кўпроқ жавоб беришини айтган”, деди у.
Шундан сўнг Киев ва Москва музокараларининг 3-раунди Беларусда бўлиб ўтган, сўнгра музокаралар Истанбулда давом этгани таъкидланди.
Изоҳ (0)