Европарламент Александр Лукашенко режимининг Россиянинг Украинага қарши “асоссиз ва ноқонуний” ҳарбий агрессиясидаги иштирокини қораловчи резолюцияни қабул қилди.
Ҳужжатда айтилишича, Беларусь ҳукумати “нафрат сўзлари, Москва риторикаларига мос келадиган дезинформация ва пропагандани” қўллаб-қувватламоқда, шунингдек, рус қўшинларини ўқ-дорилар ва жиҳозлар билан таъминламоқда, улар ва “Вагнер” ёлланма аскарларига ўз ҳудудидан ҳарбий таянч бермоқда.
Бундан ташқари, Европа парламенти Лукашенкони Украинанинг Россия томонидан босиб олинган ҳудудларидан 2 150 нафар бола, жумладан, етим болаларнинг Беларусдаги соғломлаштириш лагерларига ноқонуний олиб кетилиши ва уларни “руслаштириш”да иштирок этган деб топди.
Депутатларнинг фикрича, Александр Лукашенко ва Беларусь ҳукуматининг украиналик болаларни мажбуран депортация қилиш бўйича ҳаракатларини инсониятга қарши жиноят, деб бўлади.
“Европа парламенти Лукашенкони Владимир Путин ва Мария Лвова-Белова каби ҳарбий жиноятлар учун жавобгар деб ҳисоблайди ва шу сабабли Халқаро жиноий судни Лукашенкони ҳибсга олиш учун халқаро ордер бериш масаласини кўриб чиқишга чақиради”, — дейилади ҳужжатда.
Эслатиб ўтамиз, 17 март куни Гаагадаги Халқаро жиноий суд Россия президенти Владимир Путин ва Россиядаги болалар ҳуқуқлари бўйича комиссари Мария Лвова-Беловани ҳибсга олишга ордер берди. Улар Украинанинг босиб олинган ҳудудларидан болаларни Россияга ноқонуний равишда депортация қилишда гумон қилинмоқда, бу уруш жинояти ҳисобланади.
Изоҳ (0)