Украина президенти Владимир Зеленскийнинг қўлида мамлакатда 1—2 декабрь кунлари давлат тўнтариши ўтказиш режалаштирилаётгани ҳақида маълумотлар бор. Киевдаги пресс-марафонда Зеленский шундай баёнот берди.
«Менда биринчи (декабрь) куни давлатимизда давлат тўнтариши бўлиши ҳақида маълумот бор. Менимча, бу қизиқ ахборот», — деди Зеленский.
Украина раҳбарининг сўзларига кўра, унда разведка маълумотлари, жумладан, «Россия вакиллари билан украиналик ишбилармон Ринат Ахметовнинг Украинадаги миллиард доллар жалб этадиган давлат тўнтаришида иштирок этишни муҳокама қилаётгани» туширилган аудиоёзувлар мавжуд.
Зеленскийнинг фикрича, Ахметов шу тариқа «Украина давлатига қарши урушга тортилмоқда». Давлат раҳбари уни суҳбат учун офисига таклиф қилди.
Россия президенти матбуот котиби Дмитрий Песков Зеленскийнинг Москва Украинадаги давлат тўнтаришини режалаштиришга алоқадорлиги ҳақидаги сўзларига изоҳ берар экан, Россия «ҳеч қачон бундай масалалар билан шуғулланмаслигини» айтди.
Ринат Ахметов — Украинадаги энг бой одам. Кузда у Зеленский билан очиқдан очиқ можаро бошлади, олигархнинг назорати остидаги оммавий ахборот воситалари президентнинг ҳаракатларини фаол танқид қилмоқда.
Аввалроқ Bloomberg агентлиги манбаларига таяниб, Россия Украинага 100 минг аскар иштирокида кенг кўламли уруш очишга тайёрланаётганини ёзганди. Кремль босқинчиликка тайёргарлик ҳақидаги хабарларни қуруқ гап деб атади ва аксинча Ғарб кучларининг, жумладан, НАТО самолётларининг разведка ҳаракатлари фаоллашгани муносабати билан Москва «ҳушёр бўлиши» кераклигини таъкидлади.
Россия расмийлари Россия ҳеч кимга таҳдид қилмаслигини ва ҳеч кимга хавф солмаслигини бир неча бор таъкидлаган. Россия президентининг матбуот котиби Дмитрий Песков қўшинларнинг мамлакат ҳудуди бўйлаб ҳаракатланиши давлатнинг ички иши эканини билдирган.
Изоҳ (0)