Президент Шавкат Мирзиёев 25 декабрь куни Санкт Петербург шаҳрида МДҲ давлатлари раҳбарларининг норасмий учрашувида иштирок этди. Бу ҳақда Президент матбуот хизмати хабар берди.
Тадбирда Россия президенти Владимир Путин, Беларусь президенти Александр Лукашенко, Қозоғистон президенти Қосим-Жўмарт Тўқаев, Қирғизистон президенти Садир Жапаров, Тожикистон президенти Эмомали Раҳмон ва Туркманистон президенти Сердар Бердимуҳамедов ҳам қатнашди.
Учрашувда 2024 йилдаги биргаликдаги ишларнинг асосий якунлари сарҳисоб қилинди ва кўп томонлама ҳамкорликнинг келгуси йилга мўлжалланган устувор вазифалари кўриб чиқилди.
Минтақа ичида савдо ва кооперацияни, энг аввало, ўзаро савдодаги тўсиқларни янада бартараф этиш орқали кенгайтириш бўйича қўшма чора-тадбирларни ишлаб чиқиш муҳимлиги қайд этилди.
Кўп қиррали шерикликни янги йўналишларда ривожлантириш истиқболлари юзасидан фикр алмашилди. Муҳандислик мактабларини ташкил этиш, интернет технологиялари, катта маълумотлар индустрияси, креатив иқтисодиёт, “яшил” энергетика ва тинч атом соҳасини ривожлантириш, рақамли ечимларни жорий этиш шулар жумласидан.
Минтақавий ва халқаро аҳамиятга молик ҳамда умумий таҳдид ва хатарларга қарши курашда МДҲ доирасидаги амалий ҳамкорликни кенгайтириш борасидаги долзарб масалалар ҳам муҳокама қилинди.
Изоҳ (2)
Президентларнинг келгуси йилга мўлжалланган устувор вазифаларни белгилашлари, айниқса "яшил" энергетика, рақамли ечимлар ва креатив иқтисодиёт соҳаларидаги ҳамкорликни ривожлантириш бўйича олиб борилган музокаралар минтақа барқарорлиги ва иқтисодий ўсиши учун ижобий натижалар келтиришини англатади. Бундай учрашувлар нафақат давлатлар ўртасидаги мустаҳкам дўстликни, балки янги истиқболларни очиб берадиган лойиҳаларни амалга оширишга туртки бўлади.
Shavkat Mirziyoyevning MDH rahbarlari bilan uchrashuvi mintaqaviy hamkorlikni yanada rivojlantirish uchun yaxshi imkoniyatdir. Bunday tadbirlar orqali davlatlar o‘rtasida ishonchni mustahkamlash va kelajakdagi hamkorlikni yanada kuchaytirish mumkin. O‘zbekistonning bu jarayondagi faol ishtiroki esa mintaqa barqarorligi va taraqqiyotiga ijobiy ta’sir ko‘rsatadi.